In custas diis s’Istat at fatu connosci is ùrtimus datus chi pertocant sa letura de librus in Itàlia po s’annu 2019. Ocannu puru, cunfirmendi is arresurtaus de s’annu passau, a ligi funt su 40% de is italianus cun prus de ses annus. A ligi de prus funt is giòvanus: su 54,1% tenit tra is 15 e is 17 annus, e su 56,6% tra is 11 e is 14 annus. Sighint a ligi de prus is fèminas cun su 44,3% contras a is òminis cun su 35,5% cun unu disvàriu de rilievu. Difatis ponendi impari is datus a ligi de prus arresurtant is piciocas chi tenint tra is 11 e is 19 annus cun su 60%.
Segundu is ùrtimus datus Istat in Itàlia sa letura de librus est diferenti meda intra de Nord e Sud. Ddoi funt diferèntzias mannas a livellu de territòriu: sa letura, difatis, arresurtat prus difùndia in is regionis de su Nord-ovest e Nord-est, innui su 47/48% de is personas chi ddoi istant at decrarau de ai lìgiu asumancu unu libru.
In su Sud, sa cuota de letoris calat a su 27,9%, mentris in is ìsulas sa realidadi est ancora prus diferenti intra de Sitzìlia, cun su 25,9% de letoris e Sardìnnia cun su 38,9%. A dolu mannu sa Sardìnnia, cunfrontu a su 2018, ammostat de essi calada meda e de ai pèrdiu su 5,8 de puntus percentualis. Un’àteru elementu de importu est su chi pertocat is comunus, ca innui ddoi funt prus bibliotecas e butegas de librus sa letura arresurtat prus difùndia. Difatis in is comunus de àrea metropolitana si decrarat letori prus pagu de sa metadi de is abitantis cun su 48,2% e invècias in is comunus cun prus pagu de duamilla abitantis su datu calat a su 36%. In prus de s’apartenèntzia a unu territòriu, sa letura de librus est acapiada a su gradu de istrutzioni cun su 71,9% de laureaus, su 46,1% de diplomaus e sceti su 25,9% de chini est andau a sa scola elementari. Contant meda puru su cumportamentu e s’educatzioni chi tenit sa famìlia ca sa mira a sa letura de is pipius e de is piciocheddus dda favoressit sa presèntzia de babbus e mammas chi acostumant a ligi librus. Po nai, intra de is piciocheddus de 11-14 annus, ligit prus de su 70% de chi tenit mamma e babbus letoris e sceti su 33% de cussus chi tenint mammas e babbus chi no ligint.
Manuela Ennas