Prus de sa metadi de is italianus no arrennescit a pagai s’afitu de domu e su trinta po centus forsis no at a arrennesci a pagai is bulletas antis de Paschixedda. Custas e àteras cosas puru bessint a pillu de s’ùrtimu arrelatu Coop 2022, una circa chi sa retza de coperativas fait dònnia annu apitzus de is consumus e de is maneras de bivi de is italianus. Su stùdiu ammostat una sociedadi timorosa, cun una classi mèdia in dificultadi manna e cun ses millionis de pòberus in prus cunfronta a s’annu passau. S’inflatzioni est costendi meda a totus e, chi sighit deaici, antis de s’acabbu de s’annu sa pèrdida mèdia de su poderi de còmpora de is famìlias iat a podi arribai a 2.300 èuros. Sa curpa est pruschetotu de sa crèscia de is prètzius de s’energia e de is matèrias primas.
Ma sa situatzioni no est deaici mala po totus ca difatis sa crisi at amanniau is diferèntzias intra de is prus arricus e s’àtera genti. In su mentris chi sa majoria de is italianus est sèmpiri prus pòbera sa richesa de is millionàrius est crèscia, in s’ùrtimu annu, indiritura de su 36%. Ma lassendi a una parti is prus arricus, segundu s’arrelatu Coop is strategias chi sa genti ponit in pràtiga po cumbati sa crisi funt tres: smenguai is sperdìtzius, smenguai is spesas po su chi est in prus, lassai a su benidori is spesas po su chi no serbit luegu e totu. Is setoris prus fertus de custas maneras de fai funt cussus de sa bèndida de is veturas, de is eletrodomèsticus, de is domus e de is biaxis. Ndi sunfrint puru tzilleris e restorantis, comenti totu is logus de recreu e gosu.
No est cosa chi fait spantu insaras su smenguamentu de sa crèscia de su Pil, stimau in +3,2% po su 2022 e +1,23% po s’annu chi benit. Custa previsioni andat imparis a su chi stimant po sa crèscia de su Pil de totu su mundu, chi iat a depi passai de su +5,7% de s’annu passau a su +2,9% de ocannu. Sa circa Coop 2002 at averiguau puru calis funt is timorias prus mannas de is italianus. Mancai ancora fertus de is duus annus de apedèmia e impensamentaus po sa gherra in Ucraina, a su primu postu de is timorias ddoi funt is giambamentus climàticus. Su 36% de is intervistaus pensat chi in su benidori is cosas prus dannàrgias chi ant a incapitai in su mundu ant a essi nexi de is giambamentus climàticus.
Massimiliano Meloni