Fiat stètiu su cardinali Kevin Farrell, prefetu de su Dicasteru po is Legus, sa Famìlia e sa Vida, su 27 de gennàrgiu de su 2019, a s’acabbu de sa Gmg a Panamà, a annuntziai chi s’atòbiu imbenienti dd’iant a ai apariciau in Lisbona. A nai sa beridadi sa Dì mundiali de sa gioventudi in Lisbona dd’iant pensada po s’istadi de su 2022 , ma po nexi de s’apedèmia de Covid19 est tocau a dda perlongai a ocannu me is diis de su primu a su ses de austu. Difatis is fainas po custu atòbiu funt cumentzadas giai in su 2020 cun sa presentada de su marcu in su mesi de ladàmini, s’intregu de sa Gruxi po sa Dì chi Paba Bergoglio at tzelebrau in su mesi de donniasantu e sa presentada de s’innu ufitziali chi su Comitau Organizadori de Lisbona at fatu in su mesi de gennàrgiu de su 2021. Est duncas sighiu po mesis meda su caminu de aprontadura a sa Gmg, chi arregordaus istituida de Paba Giuanni Pàulu su de duus in su 1985, cun sa tarea de fraigai unu mamentu de atòbiu e cumpartzimentu po millionis de giòvanus in totu su mundu. Sa primu editzioni est difatis sa de su 1986 in Roma. Pustis dd’ant tzelebrada in is tzitadis de Buenos Aires (1987), de Santiago de Compostela (1989), de Czestochowa (1991), de Denver (1993), de Manila (1995), de Parigi (1997), de Roma (2000), de Toronto (2002), de Colònia (2005), de Sydney (2008), de Madrìd (2011), de Rio de Janèiro (2013), de Cracòvia (2016) e de Panamà (2019).
Su programa ufitziali po custas diis in Lisbona dd’ant cuncordau aici: Martis su 1 austu, a is seti de merì, in sa Colina do Incontro sa Missa de abertura de sa Dì Mundiali de sa Gioventudi tzelebrada de su cardinale patriarca de Lisbona, Manuel Clemente. Giòbia su 3 de austu, faciora de is ses de merì, sèmpiri in sa Colina do Incontro, s’acasàgiu e su primu mamentu de atòbiu intra de is giòvanus e su Paba. At a essi una tzerimònia de festa e in su matessi tempus de pregadoria, chi punnat a ammostai una Crèsia giòvuna, in caminu cun su sutzessori de Pietro cara a s’afradiamentu
Cenàbara su 4 de austu, a is ses de merì sèmpiri in sa Colina do Incontro ,sa Bia Crucis po acumpangiai is passus de Gesùs in sa passioni sua. Sàbudu su 5 de austu, a is noi oras de noti , in su Campo de Graça, sa Billa cun sa presèntzia de su Paba e s’adoratzioni de su Santìssimu Sacramentu po pregai totus impari. Domìniga su 6 de austu, a is noi oras de mangianu in su Campo de Graça, sa Missa de serrada innui su Paba at a fai sciri sa tzitadi sceberada po acasagiai s’editzioni imbenienti de sa Dì Mundiale de sa Gioventudi.
In custas diis sa Fundatzioni responsabili de sa Dì Mundiali de sa Gioventudi de Lisbona 2023 at presentau puru su programa de su Fèstival de sa Gioventudi, cun una lista de acontèssius culturalis, religiosus e sportivus cuncordaus de is matessis pilligrinus de sa Gmg , sèmpiri cun sa tarea de su cumpartzimentu de s’esperièntzia cristiana, proa de s’imbentu e de sa generosidadi de donniunu. Cun mamentus musicalis, spetàculus de dantza e teatru, cunferèntzias e atòbius, is giòvanus ant a podi liai e essi parti de un’esperièntzia de prexu e universalidadi de sa fidi, donendi testimònia de sa biatzesa de sa Crèsia catòlica e de s’alentu de sa fidi pròpiu cun s’universalidadi de su linguàgiu artìsticu.
In totu sa tzitadi de Lisbona, e fintzas in is comunus prus acanta comenti Loures, Almada, Amadora, Cascais, Oeiras e Torres Vedras, ddoi ant a essi palcoscènicus e logus dedicaus, sèmpiri cun s’intrada a indonu, cun prus de 500 acontèssius, ghiaus de prus de 2.500 artistas, chi ant a circai de avalorai custa esperièntzia aici nodida po giòvanus chi lompint de totu su mundu. Segundu Cláudia Lourenço, sa moderadora de su Fèstival de sa Gioventudi “custu fèstival at a essi unu mamentu bellu aìnturu de sa Dì, ca at a perlongai s’atmosfera de festa e de cumpartzidura e at a donai sa possibilidadi de biri sa fidi de una Crèsia biatza e giòvana”. Aìnturu de su programma , po nai, ddoi at a ai sa presèntzia de sa Giòvuna Orchestra Portughesa e de sa Generatzioni de Orchestras de giòvanus, una mosta asuba de vida de Madre Teresa de Calcutta, acanta a s’Igreja da Graça; una mosta de sa vida de Sant’Antoni, acanta de su Museu de Lisbona-Palácio Pimenta; unus cantu cunferèntzias, unu cuntzertu esecutau de is presoneris prus giòvunus de su presoni de Leiria, acanta a sa Fundatzioni Gulbenkian; sa presentada de “Su tzìnema segundu Francesco”, acanta sa Cinemateca; s’adoratzioni de is relìchias de is santus e de is patronus de sa GMG in is crèsias de sa tzitadi.
Sa Sardìnnia puru at a aliai parti a sa Dì Mundiali in Lisbona cun una delegatzioni de prus o mancu 650 intra de giòvunus e acumpangiadoris de dònnia diocesi de s’ìsula.
Manuela Ennas
