Cussa de ocannu a cantu parit at a passai a sa stòria comenti s’istadi de is scontrinus macus ca oramai, ddu scieus, s’opinioni pùblica punnat a meledai in contu de cussus argumentus chi naraus “de costùmini”, e medas bortas po transiri s’atentu de chistionis prus sèrias e trumentosas.
E difatis ant pesau unu bellu avolotu cussus scontrinus macus chi funt prenendi is retzas sotzialis in custa istadi traballosa po is consumadoris italianus chi ant cumpartziu totu una sèrie de ecessus stravanaus me is tzilleris e is locandas de is logus de bagantza. A lassai is borrochianus a buca aberta funt stètias is rechestas prus strambecas de is atividadis de acasàgiu, comenti su fai pagai tarifas in aciunta po donai unu pratìgliu sbuidu in prus o unu cocerinu in prus, po partiziri in duus un’intermesu o po no ponni sa spuma asuba de unu cafei cun lati. Naraus duncas chi is borrochianus si funt agataus a pagai prètzius prus artus po servìtzius chi fintzas a pagu tempus fiant inclùdius o a indonu. Is protestas no ant trigau a lompi me is “birderas digitalis” innui, a chi prus e prus ,at ammostau scontrinus e contau de acadessimentus de custa ainia, chi in pagu tempus ant fatu su giru de sa retza.
In Gera Lario, acanta de su lacu de Como, su ai partziu a metadi un’intermesu e su dd’ai fatu pagai duus èurus in prus, at ingendrau unu disdeni me is italianus chi giai giai no arrennesciant a crei chi fessit berus.Su meri de su tzilleri invècias at nau chi s’aciunta est po su traballu in prus de su camareri e su materiali (pratiglus e tialloreddas) chi serbint po partziri s’intermesu e chi duncas no ddoi at nisciuna idea de imboddicai sa genti.
In San Donà de Piave, in provìntzia de Venètzia, unu tzilleri at aciuntu 1 èuru in prus a una fèmina chi at pagau cun su bancomat invècias chi cun dinai prontu. In unu ristoranti de Alba, in provìntzia de Cuneo, in su scontrinu ant aciuntu 1,50 èurus po sa rechesta de unu cocerinu in prus po cumpartziri una portzioni de crema catalana. In unu ristoranti in su tzentru de Palermo invècias ant aciuntu sa bellesa de 20 èurus, unu èuru po donniunu de is cumbidaus, po ai segau una turta in binti fitas. In San Vito al Tagliamento, in provìntzia de Pordenone, unu borrochianu at pediu una tassa de àcua de grifoni a pustis de su cafei e at dèpiu pagai 70 tzentèsimus in prus po s’àcua. A sa rechesta de acrarimentu, dd’ant arrespùndiu chi cussu tzilleri no donat àcua de grifoni ma àcua filtrada sceti e duncas su filtru costat. Mancai potzat parri una brulla, unu tzilleri de Millesimo, in provìntzia de Savona, invècias at propostu unu scontu e fait pagai unu cafei 70 tzentèsimus sceti a chi si portat de domu sa cicaredda, su cocerinu e su tzùcuru! E comenti custus àterus scontrinus e àterus contus ant pesau unus cantu abètius tanti chi calincunu at cumentzau a pensai chi fessint trampas po atrai s’atentu de su pùblicu e de su mundu de sa comunicatzioni.
Tocat a nai chi, mancai s’inflatzioni siat crèscia de su 14% e is prètzius de su mandiari de su 22% a cantu narat s’Istat, no incapitat aici in dònnia logu e sa majoria de is locanderis sighit a traballai cun onestadi. Po ndi nai una a mei etotu m’est incapitau de pagai duus èurus sceti po duus cafeis e tres tassa de àcua in unu tzilleri in sa pratza de sa seu de Taormina, tzitadi nodida po su turismu in Sitzìlia o de ddoi prandi cun pagu prus de dexi èurus cun papai de sa traditzioni. Duncas ita tocat a fai po no arrui in custus cumportamentus? Innantis de totu tocat a sceberai beni innantis de imbucai in unu tzilleri o in una locanda, averiguendi sèmpiri is prètzius. Is chi ponint foras de su locali iant a depi essi coerentis cun is chi s’agatant in sa lista aìnturu; invècias po is chi nant “foras de su menù”, su camareri depit nai a manera ladina su prètziu e si no ddu fait teneus totu su deretu de preguntai cantu at a gastai. Un’àtera cosa de sciri est chi is bendidoris no podint dennegai s’impreu de su Pos e si incapitat fait a tzerriai is finantzieris. Aici etotu no est legali a fai aciuntas po su pagamentu eletrònicu o pretendi un’importu mìnimu pro impreai su Pos. Duncas ddu scieus chi dònnia istadi tenit su “fenòmenu” suu ma s’importu chi seus donendi a is retzas sotzialis tenit unu rolu sèmpiri prus mannu in su sentidu chi arreconnosceus a custu fenòmenu.
Manuela Ennas
