In medas eus a bolli bivi in unu mundu sena de imbrutamentu ma in pagus iaus a bolli fai de mancu, po lompi a custa tarea, a is comodidadis e a sa richesa chi donat s’isvilupu econòmicu. Chi pensaus a is giambamentus climàticus e a totu is cunseghèntzias chi pròvocant est craru chi su benidori chi si presentat fait a timmi: unu mundu cun s’ària chi no fait a respirai de cantu est imbrutada, unu mari prenu de pràstica innui no fait nimancu a bagniai, arrefudus in dònnia logu, ghiàcius chi funt sceti un’arregordu ca me is montis puru sa temperadura no calat, e sèmpiri prus soventi cun sciàscius naturalis comenti sicori, temporadas mannas, inundamentus.
Is autoridadis pùbblicas funt movendi-sì de tempus po straviai custu benidori. Ma is decisionis tenint sèmpiri cunseghèntzias e sa pregunta est a ita iaus a podi fai de mancu e a ita nono. Fintzas a candu su strobu abarrat cussu de fai s’arregolta diferèntziada de is arrefudus, mancai murrùngia murrùngia dda faeus puru, forsis sceti po stesiai una cuntraventzioni. Ma candu sa cosa si fait prus grai, e is cunseghèntzias lompint a ferri is postus de traballu, de is murrùngius si passat a sa disobedièntzia, prus o mancu civili. Et nascint is dudas e is polèmicas, ca a ponni de acòrdiu sa genti est sèmpiri prus difìcili, in unu mundu innui totus funt spertus e chi po mori de is retzas socialis donat autoridadi a totus.
Candu tocat a fai unu sagrifìtziu, est normali a dudai chi su sagrifìtziu serbat diaderus. Medas bortas is dudas no funt nimancu deaici strammas. Pigaus in consìderu una de is ùrtimas decisionis de s’Unioni Europea in contu de arrocu, a partiri de su 2035, de sa bèndida de veturas cun motori a abbruxamentu. A medas, spertus puru, custa cosa est parta una batalla prus ideològica chi profetosa tanti de fai pensai chi s’Ue siat un’istitutzioni chi no est faendi meda ma est faendi tropu po cumbati is giambamentus climàticus, sena de tenni in consìderu is cunseghèntzias po is citadinus suus. S’arrocu dd’ant fatu po smenguai is bogaduras de anidridi carbònica. Ma cantu profetu at a podi fai a s’ambienti si is bogaduras de is veturas europeas funt sceti s’1% de cussas de totu is veturas presentis in su mundu? E cantu at a essi profetosu si unus cantu de partis de is veturas elètricas tocat a ddas produsi po mori de atividadis chi alluant meda? S’alluamentu est spostau sceti, narant is crìticus, de s’Europa a àterus Stadus comenti sa Cina, favoressendi custas economias, faendi prus dannus a s’economia europea chi profetu a s’ambienti.
A castiai beni, a parti s’arrocu de is veturas a abbruxamentu, totu is leis europeas po s’amparu de s’ambienti ferrint po primu is impresas europeas, ca ddis ponint òbrigus chi me is àterus Stadus no ddoi funt. In prus ferrint is traballadoris puru ca a is impresas, po ddis cumbenni is atividadis insoru, ddas faint foras de s’Unioni Europea impitendi is traballadoris de cussus logus.
Custa cosa assimbillat a unu cani chi si mòssiat sa coa a solu ma s’UE parit chi apat agatau sa solutzioni. Martis passau su Parlamentu europeu at nau eja a cincu provedimentus in contu de ambienti cun sa tarea de smenguai de su 55%, intra de su 2030 cunfronta a su 1990, is bogaduras chi faint dannu. Sa nova prus de importu pertocat una de is maneras scioberadas: a essi fertas no ant essi prus is impresas europeas, ma cussas stràngias. Difatis is impresas chi produsint foras de s’Unioni Europea in maneras chi imbrutant meda s’ambienti, ant a depi pagai una tassa po importai is produtus in Europa e ddus bendi innoi. Su provedimentu no at a ferri totu is setoris ma sceti cussus de sa produtzioni de su lianu, de s’atzarju, de su ciumentu, de s’eletricidadi, de s’idrogenu e de su ladàmini. Comenti totu is regulamentus europeus, chi funt is leis chi tocant arrispetadas de Stadus e citadinus, is provedimentus po intrai in forzta ddis at a tocai a ddis nai eja su Consillu europeu puru. Mancai potzat parri s’ou de Colombo tocat a nai chi est sa primu borta in su mundu chi si fait una lei comenti custa.
Massimiliano Meloni
