Threads, s’aplicatzioni de Meta chi punnat a fai cuncurrèntzia a Twitter, est guadangendi una popularidadi spantosa in pagu tempus. Cun prus de 100 millionis de impitadoris arregistraus in mancu cincu diis, Threads at sobrau su primau de ChatGPT, ammostendi de essi s’aplicatzioni de custa genia cun sa crèscida prus lestra de sa stòria.
Fintzas a immoi Threads no est ufitzialmenti a disponimentu in Europa e nemancu in Itàlia. E puru sa manera de obiai custu lìmidi e intrai comenti si siat in s’aplicatzioni s’agatat etotu. Po is impitadoris de dispositivus Android, fait a scarrigai su documentu .apk de giassus internet specializaus, ma tocat a abarrai atentzionaus po no scarrigai versionis trastocadas. Po is impitadoris de dispositivus iOs, tocat a tenni un’Apple ID ativau in unu Paisu chi s’agatat foras de s’Unioni Europea.
Una borta otenta s’aplicatzioni, fait a ddoi brintai impitendi is matessis creentzialis de su prefilu Instagram. Bastat a sighiri is ìndicus po cumpriri s’iscritzioni, insertendi nòmini, datus personalis, ligàminis e sceberendi chi si disìgiat tenni unu prefilu pùblicu o privau. Fait fintzas a sceberai de ativai o nono s’arricidura de is notìficas e detzidi si sighiri is matessis prefilus sighius in Instagram.
Threads est in fainamentu po donai unus cantu de funtzionalidadis noas a is impitadoris suus. Segundu Adam Mosseri, CEO de Meta, s’aplicatzioni leugu etotu at a incluiri unu butoneddu po fai mudaduras, una pàgina dedicada a is tendèntzias e iat a podi fintzas introdùsiri una funtzioni po s’archiviatzioni automàtica de totu su chi benit pubricau.
Ma sa novidadi chi parit prus utilosa est s’integratzioni de is chi naraus hashtag, est a nai fueddus cun ananti su sìmbulu #, in stili Twitter. Is impitadoris ant a podi spriculai in mesu a argumentus de interessu e liai parti a chistionadas de tendèntzia in manera simpli. Custu scèberu iat a podi melliorai sa calidadi de sa relata aìnturu de sa comunidadi e favoressi s’intrada in Threads de àterus impitadoris nous.
Una de is funtzionis chi is bixadoris de sa retza funt abetendi de Threads est s’archiviatzioni automàtica de is fainas. Sèmpiri Mosseri at nau chi s’aplicatzioni iat a podi archiviai in manera automàtica totu a pustis de 30 diis, donendi a sa genti sa possibilidadi de essi prus aberta in su cumpartzimentu de is chistionis insoru. Custa funtzioni iat a essi unu bantaxu mannu po is impitadoris, permitendi-ddis de allogai is arregordus digitalis in manera segura e beni cuncordada.
Un’àtera novidadi de Meta in contu de Threads est s’integratzioni cun su “Fediverso“. Custa paràula pertocat una genia noa de retzas sotzialis chi permitit a is personas de si sighiri a pari e de essi in relata in prus prataformas diferentis. Threads punnat a suportai su Fediverso pròpiu po permìtiri a is impitadoris de si ligongiai cun àteras aplicatzionis chi impreant su protocollu de retza sotziali abertu chi ddi narant ActivityPub, comenti a Mastodon, WordPress e fintzas a Tumblr.
Candu imbucaus aìnturu de Threads, sa bisura de s’aplicatzioni s’ammentat meda sa de Twitter. Perou, a diferèntzia de Twitter, Threads parit ancora pagu populau de impitadoris italianus. Is post, chi si nant pròpiu “thread”, podint incluiri una parti scrita (chena lìmidis de longària) , fotografias e vìdeus. S’arrennèscida lestra de Threads, cun is nùmerus e is arresurtaus chi eus nau, ammostat cantu is impitadoris apant agradèssiu custa aplicatzioni cuncurrenti deTwitter, ma immoi tocat a biri chi Threads at a essi capassa de apoderai custa àndala e de ammanniai su nùmeru de impitadoris in su tempus imbenienti. Tocat a nai chi is mudaduras chi Twitter at fatu de pagu, comenti po nai su lìmidi de tweet chi fait a biri, iant a podi spingi is impitadoris a circai unu logu cun arrègulas prus pagu severas pròpiu comenti est Threads. De seguru su “Fediverso” at a agiudai Threads a cresci, biu s’acàpiu cun àteras retzas sotzialis.
Duncas podeus nai chi sa revolussioni de Threads est partida e mancai is disafius burocràticus po intrai in s’aplicatzioni in Europa, is impitadoris funt giai agatendi maneras creativas po dd’impreai, ca is funtzionalidadis assegurant de melliorai s’esperièntzia in su mundu sotziali, ponendi Threads intra de is prus retzas nodidas in custu panorama.
Manuela Ennas
