Est lompendi s’ora de artziai sa tassa e de bufai a sa saludi de sa Dì internatzionali de sa birra. Su 4 de austu in totu su mundu si festat custa bevida dorada – ma arrùbia e niedda puru- chi benit de s’antigòriu ma no parit antiga mancu po nudda. Sa birra tenit una stòria acisadora de milli e milli annus fait. Giai me is tempus antigus is civilidadis umanas manixànt su lori e iant scobertu su poderi de s’axedadura. E pròpriu po mori de custu processu sa birra fait parti de sa cultura de meda pòpulus de su mundu.
Sa nàscida de sa birra est cuada de unu belu de arcanus e de contus. Segundu unu de custus contus sa birra dd’ant scoberta po sorti, candu su lori dd’allogànt in strexus ùmidus, faendi axedai in manera naturali su chi ddoi fiat aìnturu. Àteras paristòrias contant de deidadis chi ant donau a is òminis su segretu de sa birra, de allogai comenti unu donu de primori. Sa birra s’agatàt in medas civilidadis antigas comenti s’Egitu, sa Mesopotàmia e sa Grècia. In Egitu, po nai, dda cunsiderànt una bevida sagra, dda produsiant e dda bufànt fitianamenti. Is faraonis teniant indiritura is fàbbricas de birra insoru, chi produsiant sa bevida po totu sa corti.
Benendi a oi, tocat a nai chi s’Itàlia (e sa Sardìnnia puru) no abarrant agoa candu si fueddat de birra. Segundu s’arrelatu 2022 de Assobirra – est a nai s’ùrtimu arrelatu uficiali de s’assòtziu de is produsidoris de birra de totu Itàlia – su consumu de birra in su Paisu nostu marcat una crèscia fitiana. In su 2021 is italianus ant spaciau prus de 8,5 milliardus de litrus de birra, su 6% in prus cunfronta a s’annu prima e sa produtzioni natzionali est crèscia de su 3%. Me is annus su mercau de sa birra est mudau meda. Cun totu chi oindì su setori, in su mundu e in Itàlia, est arribau a essi dominau de una pariga de impresas multinatzionalis chi in su tempus si funt comporadas sa prus parti de is impresas medianas e mannas, in Itàlia ddoi at logu po unus cantu de micro-birrerias chi is consumadoris agradessint sèmpiri de prus. In medas difatis circant in sa birra unu produtu sintzillu, chi siat locali e de artesanu. Segundu una circa fata de tiendeo.it, una sociedadi sperta in servìtzius de bèndida, is italianus preferrint is birras natzionalis e is butegas ddis proponnint un’oferta manna de birras de produtzioni locali puru. De is birras industrialis bèndidas, su 50,5% funt de marcas italianas (mancai sa majoria siant de propriedadi de multinatzionalis stràngias). De 105 birras pigadas in consideru de sa circa, 52 funt de produtzioni locali.
E in Sardìnnia? Puru in contu de birra sa Sardìnnia tenit is piessignus suus cunfronta a is àteras regionis. In s’Ìsula su spàciu de birra po cadaunu est su prus artu de totu Itàlia – casi 60 litrus a s’annu – e sa majoria de su spàciu pertocat una marca de birra industriali. Custa birra, mancai prodùsia de una multinatzionali olandesa, at portau a innantis una màgini regionali chi est arrennèscia a dda fai intrai me in su coru de is sardus. Acanta de is birras industrialis perou in Sàrdinnia est nàsciu e s’est afortiau unu mundu de birras de artisanu. Is produsidoris localis e de artisanu nascint de is amantiosus de sa birra fata in domu chi ant cumentzau a studiai is maneras diferentis de dda fai e a pagu a pagu ant spaniau sa cultura de sa birra aundisisiat. Funt nàscius assòtzius comenti Hbs e Fermento sardo, chi funt divènnias realidadis de importu po is amantiosus de sa birra de artisanu in Sardìnnia. Oindì in Sardìnnia ddoi funt medas birrerias de artisanu chi produsint birras de calidadi arta a sa manera tedesca, ceca, belga, americana o ingresa e sa birra sarda luxit comenti una prenda in su mundu de sa birra italiana.
Massimiliano Meloni
