Giorgio Casu, in arti Jorghe, nàsciu in Santu ‘Èngiu in su 1975, est un’artista geniosu e stravanau chi in is ùrtimus binti annus at bìviu e traballau in logus meda de su mundu, passendi de s’Amèrica a s’Austràlia, de s’ Àsia a s’Europa. De su 2010, candu ant espostu in sa Casa Bianca unu cuadru suu cun s’arritratu de su presidenti Barack Obama, su nòmini e is òberas suus funt faendi su giru de dònnia continenti e Giorgio Casu de carrera nd’at fatu aici meda chi immoi est intra de is artistas prus famaus in contu de muralismu.
De pagu tempus est torrau in Sardìnnia e in custas diis in Casteddu fait a nd’apretzai s’originalidadi in una mustra chi arregollit una bona parti de is òberas suas. Difatis “Wonderlands, la ricerca e la meraviglia”, sa primu mustra antològica dedicada a s’artista, de su 16 de làmpadas, candu ant fatu s’incingiadura, e fintzas a su 12 de cabudanni, est aberta a su pùbricu in is localis de s’Exma in Casteddu. Sa mustra po immoi dd’ant cuncordada in sa Sala delle Volte, ma in is cidas imbenientis dd’ant a ammanniai, ocupendi su logu in foras de s’Exma, sendi chi Giorgio Casu, impari a sa truma sua, at a pintai unu murali e at a apariciai puru fainas artìsticas de cumpartziri cun su pùbricu.
S’espositzioni nascit de una pensada de Cunsòrtziu Camù, cun su contributu de sa Fundatzioni de Sardìnnia, su patrotzìniu de su Comunu de Casteddu e s’agiudu de RadioX. Est a incuru de Simona Campus e circat de si donai un’idei de su tretu chi at fatu Jorghe e de is arrastus chi at lassau, contendi su svilupu de s’atividadi sua, chi movit de su muralismu e lompit fintzas a sa sculpidura, a s’arti gràfica, a sa pintura, a is prendas e a is trastos de design. Sa de Giorgio Casu est una circa posta in campu po averiguai is connessionis intra de is culturas, comenti un’arrèxini umana comuna, cussa punna chi spingit s’òmini a bivi sa vida.
Is bisitadoris ant a podi connosci is arresurtaus de custas circas, is temas e is stilis de sa produtzioni artìstica de Giorgio Casu, innui formas, coloris, animalis, froris, personas e sìmbulus de culturas diferentis s’ammesturant a pari po mori de un’imbentu chi si lassat diaderus spantaus, donendi vida a unu linguàgiu ùnicu chi fueddat de traditzioni e in su matessi tempus de innovatzioni. At a fai a bisitai sa mustra su martis a su domìnigu de is noi oras de mangianu a sa una, e de is cuàturu a is otu de merì, ma tocat a si aparagulai, sèmpiri po arrispetai is normas anti-Covid.
Manuela Ennas
