Valentino Mannias est un’atori originàriu de Serramanna, chi at pigau su diploma in su 2013 in sa scola de Arti Drammàtica “Paolo Grassi” de Milano. A pustis de su diploma at traballau in sa pellìcula “Come sposare un artista” de Monica Castiglioni e in su spetàculu “Risveglio di primavera” cun sa regia de Giampiero Solari. Sèmpiri in su 2013 at traballau in sa televisioni LA 7 in su programma “Crozza nel paese delle Meraviglie” e puru in “Attori o Corsari” de Sky Arte cun sa regia de Giampiero Solari. In su 2014 est regista e atori de su spetàculu “Esodo”, chi at portau in scena in totu Itàlia. In su mesi de argiolas de su 2015 at bintu su Prèmiu Hystrio. In su 2018 dd’ant sceberau po s’Ecole des Maîtres cun sa ghia deThiago Rodrigues.
De annus collaborat cun Sardegna Teatro e a pustis de “Giovanna detta anche Primavera” e “Donne che sognarono cavalli” immoi est torrendi in scena cun s’Orestea, sa prus trilogia famada de Èschilo chi contat de comenti est nàscia sa democratzia e de sa relata chi tenit s’òmini cun s’àteru mundu…
Agamennone, po nexi de una temporada chi blocat is navis in is costeras de s ‘Àulide, no arrennèsciit a partiri po cumbati sa gherra chi est acontessendi in sa tzitadi de Tròia. S’addivinadori Calcante fait sciri chi is divinidadis, po serenai su mari, bolint in càmbiu su sacrifìtziu de Ifigenia, sa filla de Agammennone. Insaras Agammennone, cunfusionau po sa pregunta, sceberat de sacrificai sa filla po sarvai su pòpulu suu e aici is navis podint partiri faci a sa sorti. Po custu sceberu, dexi annus a pustis, candu torrat a domu, sa pobidda Clitennestra, ancora trumentada de su dolori, no ddu perdonat e antzis ddu bocit. E su fillu insoru, Oreste, a sa torrada de su disterru, benendi a sciri de su disacatu, dd’acbbat disisperau a bociri sa mamma. Sa sotziedadi, costumada a sighiri de sèmpiri is arrègulas de sa vangàntzia, s’agatat a sceberai chi perdonai Oreste o ddi donai sa punitzioni chi minescit, donendi vida a su primu tribunali in sa stòria de s’umanidadi. Su chi fait Valentino Mannias in custu traballu, pustis de unu tempus de stùdiu de s’Orestea e de su prus sentidu fungudu de sa tragedia, est un’atòbiu intra de s’ànima arega e de su mundu sardu de su cantu a tenore, sendi chi a su spetàculu liat parti su “Sòtziu Tenore Nugoresu”, una truma de giòvanus nàscia in su 2015 cun sa tarea de promovi e fai connosci is arreìxinis prus antigas e berdaderas de custa arti nòbili.
Aici is boxis de su Tenore si faint boxi de is protagonistas de sa tragedia, acumpangendi-ddus in su svilupu tràgicu de is acadessimentus, acomunendi, po mori de su teatru, s’elementu sardu e s’elementu aregu po torrai a scoberri s’alentu chi at pesau sa cultura e is leis po sèculus. Sighendi is arrastus de sa stòria po cumprendi mellus sa sotziedadi de oi e meledai a pitzus de sa giustìtzia e de sa morti, Valentino Mannias, in scena paris cun Giuseppe Palasciano, Lea Karen Gramsdorff, Marco Spiga, Maria Grazia Sughi, Marina Occhionero e cun is mùsicas a incuru de Luca Spanu, si ghiat in una esperièntzia chi de su dolori lompit a sa sabidoria. Su spetàculu, giai postu in scena in su teatru San Giorgio de Ùdine e in custas diis in sa tzitadi de Monemvasia in Grètzia, donat a s’Orestea unu bistiri nou e una bisura chi fueddant de Sardìnnia, faendi de sa cultura nosta un’aina chena de làcanas.
Manuela Ennas
