“Adotta i tuoi luoghi del cuore” est sunòmine de su progetu sustenìbile cuncordadu de su sòtziu We Clean cun sa punna de imparare a is giòvanos su respetu pro s’ambiente e ammanniare in sa gente s’incuru e s’amparu de su territòriu in ue bivimus. Su sòtziu, ghiadu de Elisabetta Murenu, a pustis de àere fatu unu tzensimentu de s’àliga agatada in is costeras de sa Sardigna, contende sa bellesa de 4000 genias diferentes de refudos, comente plàstica, cicas de sigareta, bìculos de bidru e de terràglia, at detzìdidu de promòvere atziones e fainas de sustenibilidade pensende a unu progetu cumpartzidu. Difatis su sòtziu cumbidat is tzitadinos a adotare un’arrogu de terra pro ddu innetare, curare, e gasi amparare de s’arriscu de incuinamentu. Custas fainas cun sa tarea pretzisa de torrare una Sardigna prus lìmpia, ddas ant a ghiare professionistas, ma ant pòdere leare parte a su progetu puru volontàrios e totu is chi sustenent sentidos ecològicos e ambientalistas.
Su traballu at a incarrerare de sa Costera de su Corallu, in collaboratzione con su Comunu de S’Alighera e cun su “Parcu de Porto Conte”. In pari a s’allichidimentu e a s’amparu, is organizadores punnant puru a sa ricualificatzione de is territòrios a chi tenent unu valore paesagìsticu e ambientale de importu. S’acòrdiu, in prus de custas fainas, prevedit puru atziones de educatzione ambientale pensadas mescamente pro is giòvanos, pro ddis fàghere connòschere su problema prus a fundu e ddis fàghere nàschere sentidos de respetu pro s’ambiente, pensende gasi una generatzione de tzitadinos prus atentzionados a is cunditziones de salude de sa terra e de su mare. Su de S’Alighera est petzi su primu de is progetos ca su sòtziu dd’at a torrare a ripètere in àteros logos de sa Sardigna, agiudende a fraigare una magine de sa Sardigna profetosa puru pro cantu pertocat su setore turìsticu. Is traballos de “Adotta i tuoi luoghi del cuore” ddos ant a aparitzare cun tecnologias chi no sunt dannàrgias pro s’ambiente echena de sustàntzias chi ddu potzant impestare.
Manuela Ennas