Un’àtera pipia scarèscia in vetura, vìtima de sa “sindrome de su pipiu scarèsciu”

In su mesi de argiolas de su 1998, s’acuntèssiu de unu pipiu mortu in vetura iat cummòviu s’Itàlia: si naràt Andrea, teniat duus annus e su babbu dd’iat scarèsciu in su scannitu de sa vetura allogiada asuta de su soli. De insaras in Itàlia funt mortus ùndixi pipiuss de nimancu duus annus po nexi de cussa chi is psichiatras narant “sindrome de su pipiu scarèsciu”. Segundu is stimas, de su 2008 a oi in su mundu ant pèrdiu sa vida in custa manera prus de milla pipius.

S’ùrtimu acontèssiu est de pagu diis fait, in Roma, candu una pipia chi si naràt Stella est morta in sa vetura de su babbu, lassada asuta de su soli in unu allògiu faci a sa scola de sa pipiesa innui dda portànt. Su babbu de sa pipia, unu carabineri de 44 annus, sa Procura de Roma no at pòtziu fai àteru chi dd’incurpai de abandonu de minori, mancai siat craru chi siat stètia una tragèdia de sa sorti. Su babbu fiat bessiu de domu comenti dònnia mengianu e iat a ai dèpiu lassai sa pipia in sa scola de sa pipiesa. S’òmini fiat cunvintu de dd’ai lassada ingunis tanti chi prus a tardu, comenti ant cunfirmau is collegas, at tzerriau sa pobidda po ddi preguntai de andai issa a ndi dda liai de scola. Ma candu sa fèmina s’est presentada, is maistas dd’ant nau chi sa pipia no ddoi fiat. Sceti insaras sa fèmina at biu sa vetura de su pobiddu allogiada pagu atesu e at cumprèndiu su chi fiat acuntèssiu. Is dotoris de su 118, arribaus luegu, no ant pòtziu fai nudda, ca sa pipia fiat giai morta, allupada de sa basca de una de is primus diis stadialis.

Unu de is ùrtimus acuntèssius sìmbilis fiat incapitau in su 2019 in Catània: unu babbu si fiat scarèsciu su fillu de duus annus po cincu oras in vetura asuta de su soli. Issu puru fiat cunvintu de dd’ai acumpangiau a su niu. De una citadi a s’àtera, custas tragèdias sighint a incapitai e sciumbullant is vidas de medas famìllias.

In su 2018 su Parlamentu at nau eja a una lei (intrada in fortza in su 2019) chi òbrigat is chi portant in vetura pipius asuta de is cuàturu annus, a ddus fai setzi in scannitus chi tenint un’allarmi chi sonat, po arregordai sa presèntzia de unu pipiu. Is scannitus fait a ddus acapiai puru a is telefoneddus de is babbus e de is mammas, po mori de programmas fatus a posta. A is chi no arrispetant sa lei ddis tocat a pagai una cuntraventzioni chi lompit fintzas a 300 èurus, e in prus ddis liant cincu puntus de sa patenti puru.

A dolu mannu, s’acuntèssiu de custas diis est su primu incapitau de candu est intrada in fortza sa lei, duncas tocat a biri si su scannitu fiat a norma o nono.

Ma ita incapitat in sa conca de unu babbu o de una mamma chi si ndi scarescint de unu fillu? Segundu is psichiatras custus acuntèssius funt acapiaus a una forma de strobu mentali chi pertocat sa memòria temporànea: si fait una cosa in manera automàtica, po esèmpiu ghiai sa vetura, chena de pensai o pensendi a àteras cosas. In custus momentus, chi podint durai unu tempus longu puru, una persona si ndi scarescit de totu, ca su ciorbeddu est comenti chi si studit. S’arrexoni de custu strobu no est crara e de seguru no agiudat sa vida atrupelliada de dònnia dì, sa strachesa, is problemas fitianus. Iat a essi profetosu a fueddai de custas cosas me is cursus pre-partu po is babbus e is mammas po ddis arremonai chi custus acuntèssius podint incapitai a totus e ddis donai ìnditus po ddus prevenni. Mancai s’òbrigu de is trastus po is scannitus e is informatzionis chi iant a podi donai is pediatras, sa cosa de importu est chi po is babbus e is mammas siant crarus is perìgulus acapiaus a sa “sindrome de su pipu scarèsciu”. Tocat a pratigai strategias de preventzioni individualis fintzas simplis comenti, po esèmpiu, sa de ponni acanta de su pipiu una cosa personali chi iat a podi essi su telefoneddu o su bussigheddu. In custa manera, a chi ghiat ddi tocat a averiguai in sa vetura prima de nci bessiri, acatendi-sì po fortza de su pipiu.

Massimiliano Meloni

Atividade realizada cun su contributu de sa Regione Sardigna – IMPRENTAS 2022-2023.
LR 22/2018, art. 22
Attività realizzata col contributo della Regione Sardegna – IMPRENTAS 2022-2023.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share