Averiguai su funtzionamentu de is poetus e de is canalis de is fognas a dònnia ora de sa dì e de su noti est sa tarea de Rainapp, un’impresa finantziada de su Sportellu Startup de Sardegna Ricerche, chi at cuncordau un‘aplicatzioni digitali po prevenni is dannus candu falat àcua in temporada. S’impresa at brevetau unu dispositivu cun una prataforma software, capassa de intregai sinnialis de allarmi, inditendi cun pretzisioni su logu innui ddoi at perìgulu, po una gestioni curreta de is emergèntzias.
Me is ùrtimus 50 annus, po nexi de su tempus lègiu e po is dannus chi at fatu, a dolu mannu fait a contai prus de milli vìtimas tra chi est mortu o est abarrau ingortu, e prus de 170 milli tra chi nc’at pèrdiu sa domu o àterus benis. Is nùmeru funt giai artus ma destianus a cresci po curpa de is giambamentus de su clima de su tropu sfrutamentu de sa terra.
Pròpiu po custas arrexonis Rainapp, impresa giòvana sarda, chi traballat in su Parcu scientìficu e tecnològicu de Pula in collaboratzioni cun su Crs4, at svilupau unu sistema po prevenni e gestiri totu is arriscus chi ndi lompint impari a is temporadas: una sèrie de dispositivus de ponni in sa retza de is cundotas asuta de terra, po averiguai su livellu de s’àcua. Sa prataforma traballat cun is datus arricius e donat informatzionis utilosas po cumpidai s’arriscu de allagamentu e sinnialai a lestru una situatzioni de perìgulu in unu logu pretzisu.
Cun s’impreu de custu sistema is chi traballant po sa seguresa s’ant a podi movi deretu po ponni in sarvu sa genti e is benis puru, manixendi mellus is risursas a disponimentu e pruschetotu arrennescendi a intervenni in prus pagu tempus.
Rainapp, donendi atentu a is paràmetrus de arriscu, at a permiti de ponni in allerta no sceti is traballadoris de custu setori, ma fintzas is tzitadinus chi ant a podi donai unu sinniali de perìgulu cun is trastus digitalis insoru. Gràtzias a sa prataforma de Rainapp is amministratzionis ant a podi intervenni puru po sa mantenidura cun una pretzisioni prus manna. In prus, s’anàlizu de is datus at a permiti de progetai òberas sighendi is abbisòngius de su territòriu e de scumprendi mellus innui s’agatant is àreas crìticas agiudendi a apariciai mellus is interventus urbanìsticus po su benidori.
Manuela Ennas
