Cumentzat cras, s’otu de abrili, sa primu editzioni digitali de “Giro Autunno in Barbàgia”, un’apedalada virtuali po unu tretu de trinta chilometrus, chi movit de Nùgoro, passendi de Orgòsolo e lompit fintzas a Mamujada, po ammostai sa bellesa de is logus e promovi su turismu in Barbàgia. S’apedalada, cuncordada cun sa tecnologia Real Life Video, dd’at promòvia s’assessorau po su Turismu de sa Regioni paris cun sa Càmera de Commèrtziu de Nùgoro e s’azienda speciali Aspen, e at a pertocai is realidadis ambientalis, stòricas e culturalis prus galanas de custa zona de sa Sardìnnia.
A sa gara si funt giai scritus prus de 500 atletas e amantiosus de custu sport de 32 paisus, po su coranta po centus funt stràngius. S’apedalada at a fai a sighiri in is canalis sotzialis ufitzialis e in is prataformas digitalis de sa Camera de Commèrtziu, de Autunno in Barbàgia, de Endu Channel e de Pedalitaly, ca dd’ant a trasmiti comenti chi siat unu programma televisivu, apariciau cun sa tarea pretzisa de fai connosci e avalorai sa bellesa de is logus ainnui is atletas ant a passai. Su programma difatis no est pensau po is atletas sceti, ma fintzas po is ispetadoris chi in in custa manera ant a podi scoberri e apretziai mellus custu territòriu nodiu e spantosu, po mori puru de is contus chi nd’ant a fai espertus e personàgius famaus.
Is organizadoris de custa primu gara virtuali ant pesau su progetu cun una punna turìstica, sa chi oi naraus vocatzioni, e cun s’idei de ingendrai una forma noa, televisiva e digitali, po cumbidai is tziclistas in collegamentu de totu su mundu a liai parti in su benidori a unu giru berdaderu in Sardìnnia, in is matessis logus e territòrius chi ant scobertu gràtzias a sa realidadi aumentada e a is trastus digitalis. S’ispera est chi lompat luegu sa possibilidadi de ddu fai in presènsia e mancai a su «Giro Autunno in Barbàgia» chi s’iat a depi tenni in su mesi de ladàmini aìnturu de is atòbius in calendàriu po “Autunno in Barbàgia”.
Aici, gràtzias a custa primu editzioni de virtual cycling , disciplina chi agiudat e cumpretat su tziclismu in strada, is amantiosus no ant mai a calai de sa bitzicleta pighendi parti a unu progetu innui virtuali e reali dd’acabbant po essi sa matessi cosa, aìnturu de unu mollu chi, po mori de su tzìclismu, promovit su turismu. S’iscritzioni est a indonu e po liai parti tocat a si marcai in is prataformas ENDU e Rouvy, https://my.rouvy.com/en/signu, e a tenni a disponimentu s’arregistrazioni a Endu e a Rouvy, s’aplicatzioni Rouvy AR installada in is dispositivus eletrònicus, https://rouvy.com/en/download, e unu rullu interativu cumpatìbili o unu rullu mecànicu. Comenti eus giai nau fai a ddoi liai parti puru comenti ispetadoris sceti.
Arregordaus chi “Autunno in Barbàgia”, cun su passai de is annus, est mudau divenendi una mustra chi si movit, innui arti, stòria, folclori, artisanau e enogastronomia contant, totus impari, de unu logu. Prus de una festa est una manera de bivi cussus logus e ddus ammostai a chini ndi bolit connosci sa cara prus funguda. Dònnia bidda cun is caraterìsticas suas, cun is contus e un’identidadi de cumpartiziri. De importu mannu funt “sas Cortes”, is cortis de is domus antigas, prendas de architetura e scusòrgius de su connotu. Totu aingìriu de is biddas ddoi funt bellasas naturalis, archeologia, mandiari bellu e binu bonu. Aposentus po sa genti meda chi lompit a dònnia editzioni. Tocat a nai chi custu progetu, nàsciu in su 1996 de una pensada de su Comunu de Ulìana cun sa primu editzioni de “Cortes Apertas” ddu tenint in consideru tra is prus eventus mannus a caràteri turìsticu de sa Sardìnnia.
Manuela Ennas
