Sende su 27 de santugaine sa Die mundiale de su Patrimòniu Audiovisivu, chèrfida de s’Unesco pro ammanniare sa cuscièntzia de s’importu de is màgines e de is sonos pro una memòria visiva e istòrica, m’est bènnidu a conca unu de is prus atores mannos originàrios de Sardigna, est a nàrrere Amedeo Nazzari.
Amedeo Nazzari est su nùmene de arte de Amedeo Carlo Leone Buffa, fillu de Sarvadore Buffa e de Argenide Nazzari, nàschidu in Casteddu su 10 de nadale de su 1907 e mortu in Roma su 5 de santandria de su 1979. Custu nùmene de arte dd’aiat leadu de s’ajaju Amedeo Nazzari, chi fiat istadu presidente de sa Corte de Apellu de Vicenza e si nche fiat tramudadu a Casteddu pro traballu. Sa de Nazzari est una figura chi tocat arregordada mescamente pro s’impinnu chi s’atore at semper postu in is traballos suos sena de si nche pèrdere mai avatu de sa renessida e sa fama.
Amedeo Buffa est unu pitzineddu cando su babbu si nche morit e sa mamma, paris cun issu e cun is sorres, si nche andat a bìvere a Roma. Inoghe Amedeo istùdiat in una iscola de salesianos, in ue, cun is rètzitas teatrales, cumentzat a intèndere sa vocatzione artìstica, chi creschende in su tempus dd’at a giughere fintzas a lassare is istùdios de ingenieria pro su teatru.
Est istada s’atora Anna Magnani a cumprèndere is calidades de Amedeo Nazzari e a cumbìnchere su pobiddu, su regista Goffredo Alessandrini, a ddi donare una parte in sa pellìcula “Cavalleria”, presentada in sa de bator Mustra de su Tzìnema de Venezia in su 1936. In su 1941, semper in sa Mustra de Venezia, su conte Giuseppe Volpi de Misurata ddu prèmiat cun sa Copa de su Ministèriu de sa Cultura Populare comente mègius atore pro sa pellìcula “Caravaggio, il pittore maledetto”, semper cun sa regia de Alessandrini. Est in su 1942 cun sa pellìcula “La cena delle beffe” chi ddi lompet totu s’istima e s’aprètziamentu de su pùblicu. Sa pellìcula, ghiada de Alessandro Blasetti, est abbarrada in sa memòria colletiva de is italianos fintzas pro una batuda chi rètzitat Nazzari “e chi non beve con me, peste lo colga!” chi est divènnida cun su tempus una fràsia a sa moda ca totus dda naraiant istrochende s’atzentu sardu de s’atore.
Pustis sa gherra torrat a traballare in “Un giorno nella vita” de Blasetti, “Il bandito” de Alberto Lattuada in ue rètzitat cun Anna Magnani, “La figlia del capitano” de Mario Camerini, “Il lupo della Sila” e “Il brigante Musolino” paris cun s’atora fmada Silvana Mangano. In “Proibito”, una pellìcula de su 1954 de Mario Monicelli subra su romanzu “La madre” de Gràssia Deledda, tenet pro sa primu borta s’oportunidade de interpretare unu personàgiu sardu in unu contu de disamistade intra duas famìlias. In su 1957 su regista Federico Fellini ddu sèberat pro “Le notti di Cabiria” e ddi donat sa parte de unu divu in decadèntzia, in ue interpretat a issu etotu, faghende·sì befas. Sighit unu tempus de delusione in ue Nazzari, francu carchi parte in produtziones internatzionales, narat puru chi nono a traballos chi non dd’agradant e chi refudat pro una chistione de rispetu pro isse etotu e pro su pùblicu chi ddu istimat. In su 1963 est fintzas cundutore televisivu in su programma “Gran Premio”. In is annos ’70, pro resones de edade e de salude, francu calchi parte minore, lassat su mundu de is ischermos pro si pasiare e lassare logu a is generatziones noas de atores chi ddi depent meda in contu de custa arte e lassende unu buidu chi ancora oe est difìtzile a prenare.
Manuela Ennas
