De su primu a s’ùndixi de cabudanni, in s’àmbitu de sa Mustra Internatzionali de Arti Tzinematogràfica de sa Biennali de Venètzia, lòmpia ocannu a sa de setantotu editzionis, s’at a cumpriri puru sa de dexotu editzionis de is “Diis de is Autoris”.
Sa rassìnnia, autònoma e indipendenti, bòfia de is assòtzius de is autoris italianuas de tzìnema (Anac e 100autori), cun sa presidèntzia de Andrea Purgatori, at a proponni unu cuncursu de 10 pellìculas longas e 6 atòbius specialis sceberaus de sa diretora artìstica Gaia Furrer, chi ant a benni presentaus in acòrdiu cun sa Mustra de su Tzìnema.
Aìnturu de su programma, in sa setzioni “Notis venetzianas” ant a presentai puru unu documentàriu de una regista sarda, Stefania Maresu. Tocat a nai chi custa est sa primu borta chi una regista sarda lompit a sa Mustra de su Tzìnema, ca fintzas a immoi ddoi iant liau parti sceti òminis.
Su documentàriu contat de Princesa, chi est una picioca giòvana, de orìgini nigeriana, arribbada in Sardìnnia e vìtima de sa trata de èsseris umanus. Sa cara de Princesa cuat, e in su matessi tempus contat, unu mundu innui su meri de totu est sa timoria, innui bincit s’amargura po sa terra lassada e su disìgiu e sa spera de arrennesci a otenni un’arrescatu de sa vida. Princesa at fatu unu sceberu, ma mancai siat non est ancora lìbera.
S’idei de custa pellìcula – at conatu sa regista tataresa – est nàscia de un’atòbiu cun Princesa e de sa voluntadi de lassai un’arrastu, unu sinnu de sa stòria sua e de sa stòria de medas àteras fèminas nigerianas chi bivint un’esperièntzia drammàtica comenti sa sua. A Princesa dd’’apu connota in una comunidadi de acasàgiu po vìtimas de trata in Casteddu, innui dd’ant acòllia a pustis de nc’essi arrennèscia si nci fuiri de sa retza perigulosa de is traficantis chi controllant in Itàlia su mercau de sa prostitutzioni e de su sfrutamentu.
Sa tzinepresa est stètiu unu mèdiu po si fai acostai e e po si fai fueddai de custa circa chi s’at pigau a coru a totu e duas, est un’ograda chi liat duas diretzionis e chi collit arrogus de vida intra de sa realidadi sua e s’imaginàriu miu”.
Po ndi sciri de prus e po biri sa pellìcula fait a sighiri custu ligàmini: https://www.giornatedegliautori.com/film.asp?id=38&id_film=1552
Manuela Ennas
