In custas diis passadas in s’aeroportu de Su Masu ant incingiau Cagliari Airport library, sa primu biblioteca in Itàlia aìnturu de un’aeroportu e una de is pagus in Europa.
Sa biblioteca arregollit prus de milli librus de stòria, narrativa, traditzionis chi de immoi a innantis ant a essi a disponimentu de totu is chi depint biaxai e passai duncas de s’ala de is partèntzias.
Su progetu est nàsciu de una pensada de Sogaer, sa sotziedadi chi tenint in gestioni is servìtzius de s’aeroportu, e dd’ant postu in campu gràtzias a s’agiudu e sa collaboratzioni de aziendas imprentadoras italianas chi chi ant arregalau is librus e volùminis insoru. “Seus intra de is pagus in Europa. – at acrarau Renato Branca, amministradori delegau de Sogaer in su mentris de s’incingiadura de sa biblioteca– Su modellu nostu, prus de Amsterdam chi tenit nùmerus artus meda, est sa citadi de Tallin: un’àrea aberta a totu sa comunidadi, a is biaxadoris e a fintzas a su territòriu acanta, cun sa spera chi potzat essi in su benidori unu logu po atòbius culturalis”.
A s’incingiadura at liau su Diretori generali de s’Enac Alessio Quaranta puru.“S’incingiadura de sa Casteddu Airport library -at narau- in custu tempus de apedèmia est de seguru unu messàgiu bonu e profetosu po torrai a partiri e s’iat a praxi a biri sa matessi cosa in àterus aeroportus “. Aici etotu s’Assessori regionali po su turismu Gianni Chessa “Tocat a no si spantai de essi is primus a incarrerai progetus aici, tocat a promovi fainas ùnicas, depeus torrai a movi de sa cultura e de is traditzionis nostas, po mori de sa letura puru”.
Po immoi sa biblioteca at essi aberta po duas oras a sa dì, de is ùndixi a sa una de mangianu, ma sa tarea est de dd’aberri a dònnia ora de sa dì. In sa biblioteca fait a pigai in prèstidu is librus po unu mesi o fai unu scàmbiu lassendi su libru chi eus acabbau de ligi e sceberendi-ndi un’àteru nou. In custas diis ,acanta de sa biblioteca. ant cuncordau puru sa mustra “Visioni concrete” de Ermanno Leinardi, pròpiu po favoressi una manera noa de intendi sa cultura e donai unu sentidu nou a tretus de s’aeroportu, chi fintzas a immoi fiant sbuidus, cun espositzionis de arti e artexania, fotografia, ligiduras pùblicas e cuntzertus de mùsica.
Manuela Ennas