Arribada a sa de dexi editzionis, torrat sa Currera a colori de arrosa, cun sa ghia de Luca Sanna e de sa truma de traballu sua de sa Uisp Tàtari e s’assòtziu CurriChiSiMagna . Sa de ocannu bolit essi un’esperièntzia mellus cunfronta a is editzionis passadas cun novidadis de importu chi dd’ant a donai una bisura diferenti. Un’editzioni, sa in programma in Tàtari de su 15 a su 17 de ladàmini, chi portat un’ambasciada forti contra sa violèntzia de generi. “”Unidas in Afganistàn, in Itàlia e in dònnia logu, nci dda podeus fai” est su chi ant nau sa giornalista Susi Ronchi e sa cantadora Claudia Aru, is primus fèminas nominadas comenti opinion leader , est a nai personans chi arrennèsciint a tragai s’opinioni de is àterus cun sa insoru.
Custas figuras ant a essi depi cincu, sceberadas po s’aficu insoru in su chistionu de is deretus de is fèminas. Difatis su presidenti Luca Sanna nd’est atobiendi àteras in custas diis.
“Sa crisi afghana s’arregordat chi is deretus de is fèminas tenint abbisòngiu de una seguresa prus manna”, at nau Sanna. “In s’ùrtima cida in Sardìnnia nc’est stètia sa bocidura de una fèmina e àteras fèminas funt mortas in sa penìsula, sèmpiri bocidas de òminis – at arregordau – e depeus fai cantu prus podeus e sa boxi de is opinion leaders at a donare prus fortza a sa tarea chi teneus”.
“Asuba de sa chistioni afghana teneus duus doveris”, at nau Claudia Aru. “Si depus informai beni e depeus essi cuscentis de su chi incapitat, ma fintzas essi testimonia cun is progetus nostus de libertadi e paridadi”, at aciuntu sa cantadora. “Su linguàgiu de is mèdius massivus est prenu de stereòtipus e discriminatzionis, fatas a bortas a manera crara e a bortas a trampas “, at nau Susi Ronchi, fundadora de Giulia Giornalistas Sardìnnia.
A pàrri suu “is mèdius de comunicatzioni depint assegurai una narratzioni chi scìpiat arrispetai sa dinnidadi de is vìtimas”. Po chi bolit liai parti, fait giai a si marcai po sa currera in is ufìtzius de sa sedi Uisp de Tàtari, in bia Zanfarino 27-b, o in su giassu in lìnia sighendi custu ligàmini www.corsainrosasassari.it.
Manuela Ennas
