Su Comunu de Tàtari at fatu ischire chi s’otuìo de martzu at a leare parte a su progetu Viva Vittoria, in agiudu a is fèminas chi ant patidu violèntzia. Sa faina dd’ant presentada su 9 de ghennàrgiu a Palatzu Ducale is assessores Rosanna Arru e Antonello Sassu, sa presidente de s’assòtziu Viva Vittoria, Cristina Begni, e is referentes pro Tàtari, Angela Gandin e Caterina Cirotto.
Viva Vittoria est unu progetu nàschidu in sa tzitade de Brèscia in su martzu de su 2015 cun sa tarea de cumpartzire, pruschetotu cun is fèminas, s’idea chi sa violèntzia faghet a dda firmare cumentzende de s’atinamentu chi ogni unu de nois podet detzìdere de sa vida sua. Cando una fèmina cumprendet su valore chi tenet, benit a èssere artèfitze de s’esistèntzia sua, e capassa gasi de mudare pro issa etotu e pro sa sotziedade in ue istat.
Su progetu, giai realizadu in àteras tzitades italianas in is annos colados, punnat a a fraigare un’òpera artìstica cumpartzida chi pòngiat in relata totu is chi sèberant de addilire. Su trastu impreadu pro contivigiare custu progetu est su de “fàghere a màllia”, una tènnica antiga meda e praticada mescamente dae is fèminas, chi divenit metàfora de s’imbentu, de sa creatzione e de s’isvilupu. S’acuntissimentu, chi s’at a tènnere in pratza Casteddu, faghet parte de su programma ‘Non solo un giorno’ aparitzadu dae s’amministratzione e inghitzadu su 25 de santandria coladu, chi previdet adòbios e meledos pro totu s’annu a pitzu de is bochimentos de is fèminas e is violèntzias de gènere.
Chie cheret leare parte a su progetu depet cuncordare unu cuadradu de màllia, chi tiret 50 pro 50 tzentìmetros, fatu a busa o a uncinetu, e firmadu cun su nùmene. Is cuadrados collidos, posca, ddos ant a cosire a pare, a bator a bator, cun unu filu ruju is voluntàrias de is assòtzios chi traballant a su progetu, pro formare una coberta manna chi at a cugugiare su logu sìmbulu de sa tzitade, divenende gasi un’intallatzione artìstica. Sa regorta de dinari at a andare a su Progetu Aurora pro s’amparu de is fèminas vìtimas de violèntzia.
Manuela Ennas
