S’istadi est tempus de fèrias e cun s’acabbu- speraus – de s’apretu po su covid genti meda pensat de torrai a biaxai, fintzas foras de s’Itàlia, po visitai una de is citadis europeas aundi, po mori de is cumpangias baratas, podit lompi cun prus facilidadi.
Una noa bona pro is biaxadoris est de sèguru sa pròroga, fintzas a su 2032, de su regimi de roaming a tarifa natzionali. Su primu de argiolas passau difatis est intrau in fortza su regulamentu de s‘Unione Europea chi permitit, po chi s’agatat in biaxu in un’àteru Stadu de s’UE, de sighiri a telefonai, intregai sms e intrai in sa retza internet chena de pagai prus de cantu pagat in su Stadu suu.
Su regulamentu chi ddoi fiat prima, intrau in fortza in su 2017, scadiat su 30 de làmpadas. Is legisladoris europeus duncas ant decìdiu de allonghiai po unus àterus 10 annus is normas, e ant stabiliu puru àterus avantàgius in prus po is consumadoris.
Su regulamentu nou difatis prebidit trastus po donai a is consumadoris un’informatzioni mellus asuba de is servìtzius chi iant a podi costai de prus, comenti is telefonadas a is nùmerus de agiudu po is clientis o a is cumpangias de asseguratzioni, e prebidit fintzas de suspendi in automàticu is servìtzius de roaming candu su consumadori lompit una spesa totali de 50 èurus.
Segundu una circa UE (s’Eurobarometro de su friàrgiu 2021), po su 33% de cussus chi ant biaxau me in s’UE, me is Stadus stràngius is servìtzius de sa retza Internet fiant prus pagu lestrus chi me is Stadus insoru, e po su 28% su livellu de sa retza fiat prus bàsciu foras de su Stadu pròpriu (est a nai una retza 3G invècias de 4G).
Is consumadoris ant a tenni immoi su diritu de tenni in totu s’UE sa matessi calidadi de retza internet mobili chi s’agatat me is Stadus insoru. Ant a podi impreai in totu s’UE is matessis servìtzius chi impreant me is Stadus insoru, si custus servìtzius funt a disponimentu in sa retza de su Stadu de s’UE aundi s’agatant. In prus, su clienti in roaming chi podit impreai is servìtzius 5G in su Stadu suu at a depi tenni custa tennologia, si est a disponimentu, fintzas in su Stadu de s’UE chi est visitendi.
Massimiliano Meloni
