Su votu de domìnigu chi benit e is schedas eletoralis

Eus a votai su 25 de Cabudanni chi benit, de domìnigu, e in custa dì sceti (àteras bortas is
eletzionis ddas ant fatas in duas diis puru). Eus a votai de is seti de mengianu a is ùndixi de noti.
Dònnia eletori votat in su logu inditau in sa tèssera eletorali sua. Po votai tocat a portai avatu sa
tèssera eletorali e su documentu de identidadi.

A is eletoris dd’ant a donai duas schedas eletoralis, una de colori rosa po sa Càmera e una groga po su Senatu. Me is schedas ddoi ant a essi unus cantu de retàngulus e aìnturu de is retàngulus is sìmbulus de is partidus chi faint parti de sa matessi truma eletorali. In dònnia retàngulu in artu ddoi at a ai unu nòmini scritu in mannu. A s’ala dereta de dònnia sìmbulu de partidu invecis ddoi at a ai una lista de nòminis scritus in piticheddu. Sù nòmini scritu in mannu est cussu de su candidau de sa truma chi pigat parti a s’eletzioni me is collègius chi eligint sceti unu scannu cun su sistema de majoria (collègius de majoria). Is nòminis scritus in piticheddu funt cussus de is candidaus chi pigant parti a s’eletzioni me is collègius chi eligint prus de unu scannu cun su sistema proportzionali (collègius proportzionali).

S’eletori votat ponendi sceti una X: o apitzus de su nòmini scritu in mannu, o apitzus de su sìmbulu de unu partidu de sa truma eletorali. Chi sa X dda ponit apitzus de su nòmini scritu in mannu, cussu candidau at a pigai cussu votu in su collègiu de majoria. Po su chi pertocat su collègiu proportzionali, su votu donau deaici dd’ant a partziri intra de totus is partidus chi faint parti de sa truma eletorali.

Chi s’eletori invecis ponit sa X apitzus de su sìmbulu de unu partidu, su candidau cun su nòmini
scritu in mannu pigat etotu su votu po s’eligidura in su collègiu de majoria, ma po su chi pertocat su collègiu proportzionali su votu ddu donant sceti a su partidu marcau cun sa X e no ddu partzint intra de totus is partidus de sa truma eletorali.

Su votu balit puru chi sa X est marcada apitzus de is nòminis scritus in piticheddu, ma andat etotu a totu su partidu, poita no fait a votai sceti unu de custus candidaus ca s’eligidura benit fata cun su sistema proportzionali. Fait a ponni duas X, mancai no serbat ca est in prus, siat in su sìmbulu de unu partidu, siat in su candidau de cussu partidu in su collègiu de majoria.

No fait perou a votai duas trumas diferentis ponendi, po esèmpiu, una X apitzus de su candidau in su collègiu de majoria chi fait parti de una truma e un’àtera X apitzus de su sìmbulu de unu partidu chi fait parti de un’àtera truma. Unu votu donau deaici no balit. No fait nimancu a scriri cosas in sa scheda, ca si no dd’annuddant.

Massimiliano Meloni

Atividade realizada cun su contributu de sa Regione Sardigna – IMPRENTAS 2021-2022.
LR 22/2018, art. 22
Attività realizzata col contributo della Regione Sardegna – IMPRENTAS 2021-2022.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Total
1
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
1
Share