Is eletzionis de Domìnigu passau ddas at bintas su centru-dereta e su partidu chi at pigau prus votus est stètiu Fratelli d’Italia cun sa Presidenti sua Giorgia Meloni chi est acanta de essi sa primu fèmina in sa stòria de s’Itàlia a fai sa Presidenti de su Consillu.
Sa nòmena sua a ghia de su Guvernu perou no at a essi automàtica, ca s’Itàlia est una Repùblica parlamentari e, po s’artìculu 92 de sa Costitutzioni, est su Presidenti de sa Repùblica chi incàrrrigat su Presidenti de su Consillu de apariciai su Guvernu.
Prima de donai s’incàrrigu tocat chi su Parlamentu nou siat in fortza e custu acuntessit cun sa primu reunioni sua, chi tocat fata intra de binti diis de is eletzionis (art. 92 de sa Costitutzioni) e scieus chi at a essi su 13 de su mesi de ladàmini.
Sa primu cosa chi depint fai siat sa Camera siat su Senatu, est cussa de eligi is Presidentis insoru. Custa cosa no scieus cantu tempus at a pigai, ma sigumenti sa majoria de is chi ant bintu is eletzionis est lada, est fàcili chi s’eligidura potzat essi una cosa lestra. Is Presidentis de is duas alas de su Parlamentu, su Presidenti de sa Repùblica ddus at a atòbiai po primus, faci de su 24 de su mesi de ladàmini, prima de cumentzai su giru de is consultus. Me is consultus su Presidenti de sa Repùblica spriculitat is ghias de is partidus espressaus in Parlamentu apitzus de chini at a essi mellus a incarrigai comenti a Presidenti de su Consillu. Sa tarea de custu procedimentu, chi po is spertus at a liai tres diis, est cussa de incarrigai una persona chi siat gradèssia a sa majoria de su Parlamentu. S’incàrrigu a sa Presidenti de Fratelli d’Itàlia iat a podi arribai duncas intra de s’acabbu de su mesi de ladàmini.
Pustis de ai arreciu s’incàrrigu, a sa Presidenti de su Consillu dd’at a tocai a scerai is Ministrus. Àteras bortas sa scera de is Ministrus at pigau tempus meda, ma scieus chi aìnturu de sa majoria de centru-dereta dda funt giai faendi, duncas at a essi una cosa chi, pustis de s’incàrrigu, at a liai pagu tempus. Giai me is primus diis de su mesi de donniasanti sa Presidenti incarrigada at a fai sciri a su Presidenti de sa Repùblica is nòminis de is Ministrus.
Su Presidenti de sa Repùblica, insaras, at a nomenai in manera uficiali su Presidenti de su Consillu de is Ministrus e is Ministrus. A su Guvernu nomenau, po intrai in càrriga, dd’at a tocai a otenni, intra de dexi diis de sa nòmina, sa cunfiantza de su Parlamentu, siat de sa Camera siat de su Senatu, cun unu votu de dònniuna de is duas alas de su Parlamentu.
Massimiliano Meloni
