Mèrcuris su 15 de làmpadas est iscadiu su decretu de su guvernu asuba de is arrègulas po cumbati sa spainadura de su Covid. Su primu efetu de custa cosa est chi, a pustis de casi duus annus e mesu, in sa majoria de is logus no eus a depi prus bistiri sa mascaredda, mancai s’impreu suu dd’ arrecumandint ancora. Is mascareddas difatis no funt prus un’òbrigu nimancu me is cìnemas, me is teatrus e po pigai parti a is atòbius sportivus me is logus serraus. Su guvernu at decìdiu chi fintzas s’esamini de diploma, chi at a inghitzai mèrcuris chi benit, dd’ant a podi fai sena de mascareddas, ca s’impreu est sceti arrecumandau.
Po su chi pertocat is logus de traballu, si de una parti sa mascaredda non est prus arrecumandada po is dipendentis pùblicus, s’òbrigu po is dipendentis privaus abarrat fintzas a su 30 de làmpadas. In Crèsia, fintzas po pigai parti a sa Missa, no est prus obrigatòria ma sceti arrecumandada, e at a fai a impreai torra is acuasanteras. A su decaimentu de s’òbrigu de impreai is mascareddas, perou, su guvernu at postu calincunu lìmidi. Difatis at allonghiau a su 30 de cabudanni s’òbrigu de ddas bistiri me is trasportus pùblicus (postalis, tram, metropolitanas e trenus) e me is struturas sanitàrias, puru me is Rsa. Me is arioplanus invecis, segundu is ìnditus de su Centru europeu po su cuntrollu de is maladias, is mascareddas ant a essi sceti a praximentu.
Is arrègulas iscadidas su 15 de làmpadas no fiant sceti in contu de mascareddas, ma pertocànt fintzas s’òbrigu de vacinu po is chi tenint prus de 50 annus. S’òbrigu no est prus in fortza ma, chi unu non s’est fatu vacinai, at a reciri etotu de s’Agèntzia de is Intradas (e dd’at a tocai a pagai) sa contraventzioni de 100 èuros prebìdia de sa normativa. S’òbrigu de su vacinu abarrat in fortza po is traballadoris de su setori de sa sanidadi e de is Rsa, mancai dipendentis de foras, chi ddis at a tocai a intrai me is logus de ricòveru cun su Green pass chi ballit. In su mentris chi funt smenguendi is arrègulas contra a su Covid, s’impestu perou est torrendi a cresci. Po is spertus custa cosa no fait impensamentai, poita seus andendi faci a una situatzioni endèmica, cun undadas de impestu chi ant a torrai in su benidori ma chi po mori de is vacinus ant a essi sèmpiri prus pagu perigulosas.
Massimiliano Meloni
