Su carbon farming po cumbati is bogaduras de CO2

Su carbon farming po cumbati is bogaduras de CO2. In sa gherra contra a su giambamentu climàticu s’Unioni Europea tenit sa tarea de smenguai is bogaduras de C02, cunfronta a su 1990, de su 55% intra de su 2030 e de ddas annuddai intra de su 2050. Me is maneras sceradas po lompi a custus obietivus ddoi at su carbon farming. Su carbon farming est unu sistema chi arrennèsciit a sfrutai sa capacidadi naturali de sa terra de ammagasinai anidridi carbònica, e de dd’impreai comenti sustàntzia orgànica po ndi favoressi sa fertilidadi. In pràtiga sa fotosìntesi clorofilliana fait comenti a una pompa, pighendi CO2 de s’ària po mori de is prantas e mudendi-dda in tzùcurus chi prima finint impresonaus in follas, cambus,
arrexinas e a pustis benint bogaus in sa terra. Is tènnicas po impresonai s’anidridi carbònica funt medas, po esèmpiu ddoi at sa cover crop, est a nai corturas chi no funt fatas po s’arregorta ma chi serbint invecis po coberri su sartu me is mesis de s’ierru. O puru ddoi at su minimum tillage chi prebidit de arai su sartu sceti pillu-pillu po evitai chi sa molècula imprisonada bessat a foras.

Cun custas tènnicas iat a fai a impresonai de 2 a 2,5 tonnelladas de CO2 po ètaru, chi funt paris ais bogaduras fatas in un annu de una vetura chi fait casi 19milla chilòmetrus. Nau deaici parit simpli, ma ddoi at unu problema: su carbon farming no cumbenit. Custas tènnicas difatis, a su mancu me is primus annus, faint perdi resa a sa terra, e in prus tocat a impreai machinàrius chi costant meda. Po custas arrexonis tocat a pentzai agiudus po is massajus, ma is problemas po cuncordai unu sistema deaici funt medas, po primu cosa tocat a agatai sa manera po arrennesci a carculai sa cantidadi de CO2 imprisonada. Difatis esistit unu perìgulu mannu de trassas malas.

S’Unioni Europea est pentzendi a is maneras de superai custus barrancus e at inghitzau a si movi. In su mesi de Idas passau sa Cummissioni at imprentau sa Comunicatzioni asuba de is Perìodus de su Carbòniu Sustenìbilis. Su documentu benit prima de una Diretiva chi ant a presentai in su 2022, chi a s’acabbu at a arreconnosci su rolu de su carbon farming, in sa gherra contra a su giambamentu climàticu.

Massimiliano Meloni

Atividade realizada cun su contributu de sa Regione Sardigna – IMPRENTAS 2021-2022.
LR 22/2018, art. 22
Attività realizzata col contributo della Regione Sardegna – IMPRENTAS 2021-2022.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Total
1
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
1
Share