Su Ministeru de s’Istrutzioni at fatu connosci is èsitus de is esàminis de diploma de sa scola segundària de primu e de segundu gradu.
Is arresurtaus de sa scola de primu gradu.
Po su chi pertocat custu òrdini de scola, is studentis ammìtius fiant su 98,5% de su totali (in Sardìnnia su 97,9%). De custus, su 99,9% ddus ant promòvius.
In duas regionis, su Molise e sa Basilicata, ant promòviu a totu is chi ant fatu s’esàmini.
Me is esàminis de sa scola de primu gradu sa votatzioni finali est espressada in votus de unu a dexi. Su 7,9% de is studentis at lòmpiu sa votatzioni màssima, mentris su 19,4% at pigau noi e su 25,8% otu. Su 5,9% de is candidaus at tentu fintzas sa laude, est a nai su bàntidu de parti de sa commissioni de s’esàmini). Sa regioni cun prus studentis de primu gradu cun sa laude est stètia sa Pùglia (su 8,8%), sighida de sa Calàbria (8,6%) e de su Molise (8,5%). In Sardìnnia sa laude dd’at pigada su 7,8% de is candidaus.
Is arresurtaus de sa scola de segundu gradu.
In contu de custu òrdini de scola, is studentis ammìtius fiant su 96,2% de cussus chi ant fatu s’ùrtimu annu. Fintzas in su segundu gradu su 99,9% de is ammìtius ddus ant promòvius (su datu est su matessi de s’annu passau).
Chi pigaus in consìderu is votus, bieus chi calant is studentis chi ant pigau 100, est a nai su màssimu (funt su 9,4% respetu de su 13,5% de s’annu passau). Crescint perou is diplomaus cun sa laude, chi funt su 3,4% respetu de su 3% de un’annu fait.
No mudat meda sa percentuali de is votus intra de 91 e 99 (de su15,6% a su 15,1%) e intra de 81 e 90 (de su 20,8% a su 21%). Sa fàscia de votu cun prus studentis est cussa 60-80, cun su 51,2% de diplomaus (s’annu passau fiant su 47,1%). Is diplomaus in sa fàscia 71-80 invecis passant de su 23,8% a su 27%, mentris cussus in sa fàscia 61-70 passant de su 18,5% a su 20,1%. Calant mancai de pagu is 60, chi passant de su 4,8% a su 4,1%.
Sa regioni cun su nùmeru prus artu de diplomaus cun laude, in percentuali, est sa Calàbria (6,6%). Sighint sa Pùglia (6,3%), s’Ùmbria (5%) e sa Sitzìlia (4,8%). Sa Sardìnnia, cun su 2,4%, est sa de trexi.
Me is Liceus su 5,1% de is candidaus at pigau sa laude (in crèscia respetu de su 4,7% de s’annu passau), su 12% at pigau 100. Me is Istitutus Tènnicus sa laude dd’at pigada su 1,8% de is candidaus (unu datu chi no mudat respetu de un’annu fait) mentris su 7,1% at pigau 100.
Me is Scolas Professionalis sa laude dd’at pigada su 0,9% de is candidaus e su 5,8% est lòmpiu a 100.
Massimiliano Meloni
