Su 24 de su mesi de gennàrgiu, intra de pagus diis, ant a cumentzai is fainas po s’eligidura de su Presidenti de sa Repùblica. A su Presidenti ddu eligit su Parlamentu in sètzida comuna, cun is deputaus e is senadoris chi s’atòbiant in sa Càmera de is deputaus. A s’eligidura pigant parti fintzas tres delegaus po dònnia Regioni (ma sa Baddi de Aosta ndi tenit sceti unu).
Is eligidoris, chi ddis narant fintzas eligidoris mannus, ant a essi 1009: 630 deputaus, 321 senadoris e 58 delegaus de is Regionis. Is delegaus sardus, sceberaus de su Consillu regionali, funt su Presidenti de sa Regioni Christian Solinas, su Presidenti de su Consillu Michele Pais e su ghiadori de su Pd in su Consillu Gianfranco Ganau. Po no fai ammuntonamentus in custus tempus de apedèmia is eligidoris ant a votai partzius in trumas de 50. Intra de una truma e de s’àtera sa Càmera at a essi limpiada a fundu e in una dì ant a podi fai una votatzioni sceti.
Po eligi su Presidenti serbit una majoria de votus arta meda, chi a su sòlitu no arribat a sa prima votatzioni. Sa Costitutzioni prebidit chi me is primas tres votatzionis serbint is 2/3 de is votus de s’assemblea, est a nai 673. De sa de cuàturu votatzionis bastat sa majoria assoluta, chi est de 505 votus.
Po sa Costitutzioni su Presidenti, chi abarrat in càrriga po seti annus, est su ghiadori de su Stadu, e a calisisiat tzitadinu italianu chi tèngiat 50 annos e is deretus tzivilis e polìticus ddu podint fai Presidenti.
Mancai no tèngiat nisciunu de is tres poderis prus de importu de su Stadu (legislativu, esecutivu e giuditziàriu) in calincuna manera su Presidenti intervenit in donniunu de custus. Difatis, comenti a rapresentanti de s’unidadi natzionali est asuba de totus is àterus òrganus de su Stadu. Po custa arrexoni ddu eligit una majoria manna e abarrat in càrriga prus de su matessi Parlamentu chi dd’at elìgiu.
Is poderis suus funt pruschetotu formalis, ca issu donat sceti solennidadi a decisionis chi ant pigau àterus (po ndi nai una pregonat is legis aprovadas de su Parlamentu) o fait àutus chi depit fai amarolla (po ndi nai un’àtera stabiliri is eligiduras). Ma impari a custus poderis formalis, su Presidenti tenit fintzas poderis sustantzialis, chi esèrcitat po assegurai s’arrespetu de sa Costitutzioni o po arresolvi is situatzionis de crisi.
Is poderis prus de importu funt sa nòmina de su guvernu e sa sciollidura in antìcipu de su Parlamentu. Candu sciollit su Parlamentu su Presidenti ddu fait comenti chi fessit un’àrbitru: difatis candu su sistema est arrèsciu, ca su guvernu si dimitit o puru no fait a ndi fai un’àteru, su ghiadori de su Stadu tenit s’ùrtimu fueddu po arresolvi sa situatzioni.
Massimiliano Meloni
