S’atualidade de sa pedagogia de Maria Montessori in sa didàtica de oe

Su mètodu Montessori est unu sistema educativu chi at creadu e isvilupadu s’italiana Maria Montessori. Est connotu in totue e ddu pràticant in 65 mìgia iscolas de totu su mundu. Su mètodu Montessori est una disciplina cun sa tarea de doanre a su pipiu sa libertade de si espressare desei sena chi nemos dd’apat cumandadu o obrigadu. Segundu Maria Montessori su istare bene est su resurtadu de sa “liberatzione de s’ànima” e in sa crèschida de su pipiu, is mannos depent intervènnere petzi pro dd’agiudare a conchistare custa libertade. Su creare ambientes familiares fatos a mesura, su donare trastos pedagògicos istudiados aposta, su favorèssere s’isvilupu intelletuale de su pipiu, averiguende su cumportamentu suo sena de si pònnere in mesu, dd’at a permìtere de imparare, de si currègere fintzas a sa sola, e de agatare arremèdios pro bìnchere is dificultades. Sa primu “Domo de is pipios” Maria Montessori dd’at fundada a Roma in su 1906. Movende dae su traballu suo e de is òperas suas est nàschidu unu movimentu chi in pagu tempus s’est ammaniadu in una ala manna de Europa e fintzas a livellu internatzionale. Sunt nàschidas Domos de is Pipios in Ispagna, in Olanda, in Inghilterra, in Amèrica pro imparare e aplicare s’impreu de custu mètodu nou.

Su mètodu Montessori at portadu giambamentos mannos in su cuntzetu de imparu e annèstriu de su pipiu. Su ruolu e su traballu de su maistru ant mudadu diretzione cunfronta a is mètodos traditzionales de imparamentu. Pro chie at sighidu s’ideologia montessoriana no est istadu gasi simple a dda praticare, ca su nche stesiare dae su mètodu clàssicu resurtaiat difìtzile meda. Custu pro ite su maistru depet imparare a distìnghere su traballu chi podet fàghere de cussu chi non tocat a fàghere. Pro nche renèssere depet, in antis de si pònnere in relata cun su pipiu, praticare un’istùdiu psicològicu de su cumportamentu suo. Petzi deaici at a arrennèschere a fàghere espressare a su pipiu su sentidu suo sena de ddu serare in làcanas giai istabilidas. In su fàghere connòschere unu trastu a su pipiu, pro esempru, su maistru diat a dèpere ispricare sa funtzionalidade sua cun paràulas simples e sena de si allonghiare meda. Diat a dèpere lassare posca su pipiu lìberu de fàghere de cusseguèntzia e mancari siat faddinde non diat a dèpere interbènnere pro dd’agiudare a dd’impreare bene, ca s’interbentu de su maistru in sa faina diat a leare a su pipiu sa dignidade e sa libertade de nche renèssere a solu. Su maistru at a torrare un’àtera borta a ispricare su matessi trastu donende a su pipiu un’àtera possibilidade de imparu.
In Sardigna puru nche sunt iscolas chi impreant su mètodu Montessori. Dae pagu s’Assessoradu de sa Istrutzione Pùblica de sa Regione at fintzas abertu unu bandu pro donare contributos a is comunas chi cherent finantziare iscolas primàrias e de sa pitzinnia cun mètodu Montessori. Sende chi b’at ancora meda de nàrrere subra su mètodu Montessori, pro chie nde bolet ischire de prus, chenàbura su 6 de martzu, in Casteddu, in su locale Meccano, b’at un’atòbiu a pagamentu, pro resonare de s’abertura de una Iscola Montessori in Casteddu.

Manuela Ennas

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Total
2
Shares
Загрузка...
Related Posts
Total
2
Share