“Su setori de is paneteris sardus est in crisi forti ma a cantu parit sa cosa no interessat a sa polìtica regionali ca no est pighendi in consìderu chi seus fueddendi de unu setori stratègicu de su sistema produtivu de sa Sardìnnia” at nau Gian Pietro Secchi, presidenti de is paneteris de sa Confcommercio, chistionendi de is problemas de sa categoria e pedendi s’agiudu de sa Regioni po abasciai is costus de produtzioni, artziaus meda me in is ùrtimus tempus, e po agatai traballadoris cualificaus chi funt sèmpiri prus pagus.
“Seus partius beni in su 2016 cun s’istitutzioni de sa lei 4 de sa Regioni Sardìnnia, chi arreconnosciat unu rolu de importu a s’arti de su panitzai e a su pani friscu, ma sa lei tenit unus cantu puntus de portai a comprimentu e cun sa giunta noa su progetu s’est firmau – at aciuntu su dirigenti de Confcommercio – s’agataus in mesu a unu mamentu difìtzili ca, a dolu mannu, is prètzius de is matèrias primàrgias in duus mesis parit chi apant pigau su bolu: sa farra de trigu tostau at tentu una crèscida de prètziu de su 100% passendi de 0,55 centèsimus a a 1 èuru su chillu, a s’imbressi sa farra de trigu moddi, est passada de 0,40 a 0,70 centèsimus a su chillu , ma non at a atrigai a arribai a 1 èuru”.
Gian Pietro Secchi at fatu fintzas un’analizu de is arrexonis de sa crisi: “Su mercau est pruschetotu in manu a atoris chi ponint cunditzionis a su prètziu, ma ddoi at fintzas sa crèscida de sa spesa po is combustìbilis chi alimentant is impiantus de produtzioni e chi contant po su 10% de su totali”.
Sa categoria duncas bolit preguntai a sa Regioni de intervenni cun su chi podit ponni a disponimentu, mancari pensendi a unu provedimentu chi permitat de smenguai su prètziu de s’àcua, opuru studiai una forma de agiudu po is chi impreant energia elètrica e gasòliu.
Manuela Ennas
