A cantu narant is resurtados de is ùrtimas chircas is sardos sunt tra is chi ponent mellus in pràtiga sa collidura de s’àliga diferentziada. Gràtzias a una cumpartzidura profetosa de sa cultura de sa collidura e de sa partzidura de is refudos chi oramai faghet parte de is abitùdines fitianas in belle che totu is comunos isolanos, sa Sardigna est lòmpida segunda in sa classìfica de is 20 regiones italianas; in antis ddoe at petzi su Vènetu e invècias dda sighint suTrentinu Südtirol, sa Lombadia e s’Emìlia rRmagna. Bene meda pro Casteddu, chi est sa primu intra de is Tzitades metrpolitanas italianas.
Is datos generales nos mustrant comente n Itàlia sa collidura diferentziada siat sighende a crèschere, arribbende a su 61,3% de su totale de is refudos. Ma de custa àliga, mancari regorta bene, petzi sa metade benit torrada a impreare in manera efetiva, su 53,3%, curpa de sa farta de is impiantos de tratamentu, cuntzentrados mescamente in is regiones de su nord e non bastantes in cussas de su tzentru-sud. Una de is cunsighèntzias est chi in su tzentru-sud s’isperdidura de is refudos costat a is tzitadinos prus chi a su nord. Est custu su cuadru de su tratamentu de is refudos urbanos in Itàlia essidu dae su raportu annuale de s’Ispra, s’istitutu de chirca de su Ministeru de s’Ambiente, e basadu subra is datos de su 2019.
In s’annu coladu sa collidura diferentziada in Itàlia est crèschida de su 3,1% respetu a su 2018, crompende su 61,3% de sa produtzione natzionale. Su Sud at propassadu pro sa primu borta su 50% de diferentziada, cunfirmende s’andamentu de crèschida de is ùrtimos annos, cun una pertzentuale de 4,5 puntos. Is regiones primas de sa classe, est a nàrrere is chi s’agatant ultres su 65% de collidura, in prus de sa Sardigna (73,3%), sunt belle totus de su nord: Vènetu (74,7%), Trentinu Südtirol (73,1%), Lombardia (72%), Emìlia Romagna (70,6%), Marche (70,3%), Friuli-Venètzia Giùlia (67,2%) e Umbria (66,1%). A suta de su 50% abarrat sa collidura in Basilicata (49,4%) e Calàbria (47,9%), mentras sa Sitzìlia est ancora a suta de su 40%.
Tocat a nàrrere però chi in su sud is cosas sunt megiorende: is crèschidas prus mannas de collidura diferentziada ddas tenimus in Molise (+12%) e Sitzìlia (+9%), sighidos de sa Sardigna (+6,3%), de sa Pùglia (+5,2%) e de s’Abrutzu (+ 3,1%). Sa tzitade de Treviso (86,9%) e sa provìntzia sua (87,7%) si cunfirmant is campiones italianos de sa diferentziada, gràtzias a un’organizatzione pretzisa, mescamente de su cumpartu industriale.
Intra de is tzitades prus virtuosas Ferrara cun su 85,9% e Pordenone cun 85,5%. Is tzitades metropolitanas sunt ghiadas de Casteddu cun su 71,4% e Venètzia a su 70,9%. Subra su 60% ddoe sunt Milanu, Bologna e Firenze. Sa Sitzìlia est su territòriu italianu prus in dae segus in su tratamentu de s’àliga. Intra de is tzitades metropolitanas, Palermu est sa chi faghet prus pagu diferentziada (29%), mancari s’annu coladu est crèschida de su 9,1%. Andant male fintzas Tàrantu (16%) e Crotone (11%).
Mancari sa collidura diferentziada, no est naradu chi posca su refudu bèngiat recuperadu. Su ritziclu totale segundu s’Ispra arribbat agigu a su 53,3% de s’àliga regorta. Su chi abarrat andat a su muntonàrgiu o benit brusiadu, torrende a nudda is isfortzos de tzitadinos e comunos. Is datos de su raportu faghent cumprèndere cantu custu acontesset. In su 2019 fiant operativos 658 impiantos de isperdidura de is refudos urbanos: 355 in su Nord, 121 in su Tzentru e 182 in su Sud.
In su tzentru-sud mancant is impiantos pro mudare s’àliga in àteros materiales e duncas, nudda ritziclu. E is resurtados si bident subra de su tàschinu de is tzitadinos: pagu ritziclu, pagos balàngios pro is Comunos, tando impostas de s’àliga prus salidas. In su 2019, su costu mèdiu natzionale de gestione de is refudos urbanos est istadu de 175,79 èuros a s’annu pro abitante. In su Tzentru però su costu fiat de 208,71 èuros pro abitante, in su Sud de 188,53 èuros. In is regiones de su Nord, su costu falaiat a 155,83 èuros.
Manuela Ennas
