Oto ètaros de terras in su tretu de costera tra sa marina de ‘Le Bombarde’ e cussa de su ‘Lazzaretto’, a S’Alighera. Unu logu de bellesa manna e nuscos de màcia mediterrànea chi in su 1992 su maistru Claudio Abbado aiat comporadu de s’Ersat, ente pro sa laurera de sa Regione Sardigna, pro ddu sarvare de su perìgulu de discàrrigas o de s’ispeculatzione edilìtzia de is chi in cussu logu giai immaginaiat de fraigare posadas pro turistas e gente rica. Un’ispantu de naturalesa chi immoe, a su de sete anniversàrios de sa morte de su diretore famadu de s’orchestra milanesa, sa famìlia sua de at seberadu de giare a indonu a Legambiente chi dd’at a pòdere impreare cun sa tarea de ddu trasformare in unu logu incantadu ue promòvere e pònnere in pràtiga programmas ecològicos e de chirca botànica.
S’acòrdiu dd’ant presentadu in manera ufitziale carchi die a como in una cunferèntzia in vìdeu a ue ant leadu parte Alessandra e Francesca Abbado (filla e nebode de s’artista),is rapresentantes de s’assòtziu ambientalista a livellu natzionale e locale (Stefano Ciafani, Annalisa Colombu, Michele Meloni e Roberto Barbieri), su sìndigu de sa tzitade catalana Mario Conoci e su presidente de su Parcu regionale naturale de Portu Conte, Raimondo Tilloca.
Michele Meloni, su presidente de su tzìrculu de Legambiente de Tàtari at naradu chi ant a èssere medas is fainas de cuncordare, comente pro nàrrere cursos de giornalismu ambientale pro is dischentes ca ant averiguardu chi b’at interessu e consideru de medas istitutos de iscola de segundu gradu chi diant a incarrerare cun praghere fintzas traballos in pare. E no ant a mancare fainas e istùdios pro fàghere connòschere custu patrimoniu botànicu in totue.
In su mentres de s’adòbiu a distàntzia sa filla Alessandra at chèrfidu faeddare de s’amore de Claudio Abbado pro s’ambiente. A naradu fintzas chi si su babbu suo no esseret istadu unu mùsicu diat èssere istadu de seguru unu giardiniere, arregordende de dd’àere bidu bortas meda passigiare in mesu de sa flora de S’Alighera, mancari tirende is follas sicadas dae is matas e in su matessi tempus andende a tempus cun is mùsicas suas.Cando aiat detzìdidu de ddu comporare, cussu terrenu fiat cobertu de refudos de ogni genia e pro custa resone ddoe at istadu bisòngiu de una bonìfica. Posca Claudio Abbado aiat fatu prantare noe milla prantas, pro torrare a istabilire s’ambiente de sa màcia mediterrànea tìpica de su logu.
Sa nebode Francesca Abbado faeddende a nòmene de totu is nebodes de su maistru at naradu chi ambiente e cultura sunt is fondamentas de una sotziedade sana, is puntos de adòbiu sunt paritzos, oe prus ladinos chi mai in su reconnoschimentu chi sa crisi climàtica est pro medas aspetos fintzas una crisi culturale. Is passiones prus mannas de Abbado fiant sa mùsica e sa natura e immoe sa famìllia cheret sighire a tzelebrare su remenu suo: su de S’Alighera rapresentat unu logu pro s’amparu de sa naturalesa e in sas manos de Legambiente at a pòdere divenire fintzas unu logu de adòbiu, de chirca e de annestru. Puru Roberto Barbieri, presidente de su tzìrculu de Legambiente de S’Alighera, chi at chistionadu de sa relata intra de mùsica e botànica, ca “sa paràula armonia – at ammentadu – tenet nessi duos sentidos: un’estèticu-filosòficu e unu musicale e matemàticu.Difatis is istudiosos ant mustradu chi esistint secuèntzias de nodas capassas de favorèssere sa crèschida de is prantas”.
Su sìndigu Mario Conoci at torradu gràtzias a sa famìlia e aici puru sa presidente de Legambiente Sardigna, Annalisa Colombo, chi at faeddadu de custu progetu comente de nu mollu de metzenatismu ambientale chi at a donare vida a un’aventura noa pro totu sa Riviera de su Corallu.
Manuela Ennas
