Sa de ocannu puru at a essi una Pasca Manna smenguada po nexi de su Covid, no at a fai a dda festai prus de tanti e nemancu a liai parti a is ritus traditzionalis de sa Cida Santa chi in Sardìnnia funt de sèmpiri una richesa de su patrimòniu religiosu e culturali. Ma nci funt traditzionis po custu tempus de fidi chi fait a portai a innantis in domu puru cun sa matessi devotzioni. Intra de custas oi bollu fueddai se su cocoi cun s’ou, connotu puru cun su nòmini de anguli.
In s’antigòriu is pipius po Pasca Mannas de seguru no arriciant ous de ciuculati comenti acontessit immoi, ma s’anguli chi fìat unu pani de sìmbula, piticu, chi teniat in mesu un’ou cotu a tostau. S’anguli, su cocoi chi is ajajas nostras faiant mescamenti po sa domìniga de Pasca Manna po dd’arregallai a is pipius e a is stràngius, est duncas cussa genia de cocoi traballau a fini, a punta de ferrus o cun s’arresojedda o cun pintadura a unga, chi teniat s’ou in mesu a is pitzicorrus e a is cuncordaduras. A su pani ddi donànt formas diferentis, de pilloneddu, de pudda, de pupa, de goneddu, de gruxi. Is famìllias prus pòberas, chi no si podiant permiti de ddoi ponni ous, impreànt sa mèndula po donai durciori a custu pani.Fiant sèmpiri is fèminas de domu a ddu fai, ca su pani in Sardìnnia est pruschetotu una faina de fèminas, casi comenti unu ritu po cunsagrai sa fertilidadi e s’abbundàntzia.
S’ou est unu de is prus sìmbulus rapresentativu de sa Pasca Manna, ca de s’ou nascit sa vida, pròpiu comenti Gesugristu, arresuscitau a pustis de tres diis, est sìmbulu de sa vida noa. Est duncas unu pani sìmbulu chi tzèlebrat is sentidus religiosus de sa Pasca Manna e in su matessi tempus sa rinàscida de beranu, cun una relata intra de religioni e arreìxinis paganas de orìgini bizantina.
Ma anguli ddu naraus puru po inditai unu pani antigu chi acostumànt a fai pruschetotu in is domus de is pòberus poita serbiat pagu dinari po ddu fai e donàt s’idei de papai meda ca preniat luegu su stògumu. A bortas fiat su mandiari po prandi ma ddu arregolliant comenti smurzu po su traballu in su sartu. Ddu cundiant in prus de una manera ma sa prus connota fiat s’anguli de cibudda. A nai sa beridadi, pruschetotu in Ollastra, si fait ancora ammesturendi a sa farra cibudda, crocorighedda, tamatiga frisca, casu de fita, gerdas e ollu de porcu e si traballat comenti po fai su pani.
Manuela Ennas
