Sa crèscida de s’inflatzioni est unu fenòmenu chi est ponendi in pensamentu s’economia globali. In su mesi de martzu, segundu s’Istat, in Itàlia is prètzius de is benis de consumu funt crèscius de su 6,5%. Po nexi de is prètzius prus artus, a dolu mannu, a is consumadoris ddis tocat a comporai prus pagu cosas. Po cumbati sa smenguadura de is bèndidas, medas impresas funt impreendi unus cantu de trassas. Sa shrinkflation est una de custas trassas e serbit a cuai sa crèscida de is prètzius.
Shrinkflation est unu fueddu ingresu cuncordau cun su verbu “shrink”, chi bolit nai stringi, e “inflation”, inflatzioni. Est unu fenòmenu globali, chi in custus tempus est spainendi-sì fintzas in Itàlia. Po mori de custa pràtiga is impresas no àrtziant, o àrtziant de pagu, su prètziu de is produtus chi bendint, ma smènguant perou sa cantidadi de produtu chi ponint aìnturu de is cunfetzionis. In custa manera su consumadori agatat me is butegas is cunfetzionis agualis a is chi agatàt prima e ddi parit de podi fai sa matessi spesa de sèmpiri, ma chi partzit su prètziu po sa cantidadi de cosa pigada, si nd’acatat de pagai unu prètziu prus artu de prima.
Po custas arrexonis su Codacons at presentau un’espostu a s’Antitrust e a 104 Procuras spratas in totu Itàlia pedendi -ddi de averiguai chi custa trassa cummerciali siat una frigadura o una pràtiga cummerciali pagu giusta cunfronta a is consumadoris. S’assòtziu pigat in consìderu una circa de pagu tempus fait de s’Istat, chi at bogau a pillu 7306 acadessimentus de shrinkflation in butegas e supermercaus in totu Itàlia. Is produtus prus pigaus in consìderu de su fenòmenu funt su tzùcuru, is durcis, is cunfituras, su ciuculati e su meli. A custas cosas tocat a aciungi fintzas sucis de fruta, lati, casu e cremas de bellesa.
Segundu su Codacons sa shrinkflation fait guadangiai dinai meda a is impresas sbuidendi is busciacas de is consumadoris e realisendi una gènia de “inflatzioni cuada”. Is consumadoris, difatis, funt sensìbilis meda a is prètzius de is cosas, ma est difìcili chi si potzant agatai de giambamentus piticus in sa cunfetzioni o potzant donai atentu a is ìnditus, scritus in piticu, chi pertocant sa mesura o su pesu de unu produtu.
Massimiliano Meloni
