In custas dies est in programmatzione in is tzìnemas sardos s’ùrtima pellìcula de su regista tataresu Bonifacio Angius, ma podimus giai chistionare de una renèssida manna.
S’òbera in chistione at giai bintu su prèmiu pro sa Mègius regia e sa Mègius pellìcula pro sa giuria giòvanos in su Annecy Cinéma Italien Film Festival, su fèstival de tzìnema italianu prus de importu in Frantza e dd’ant fintzas seberada in sa categoria de is pellìculas istràngias pro su prèmiu Oscar de s’annu chi intrat.
Is atores chi ant leadu partu sunt Angius etotu, in su rolu de protagonista, Stefano Deffenu, chi at traballadu paris cun Angius a s’iscenegiadura, is frades Stefano e Michele Manca, Riccardo Bombagi, Stefania Niedda, Noemi Medas, Roberta Passaghe, Mila Angius. Sa mùsica est de Luigi Frassetto e si fueddat giai de s’essida de su discu a 33 giros in vinile. Sa produtzione est de Sardegna Film Commission e de Il Monello Film, sa sotziedade de produtzione de Angius.
Is figuras de fèminas non sunt medas ma su regista ddas at bòfias lassare unu pagu in su fundu de sa narratzione pròpiu pro pònnere prus in lughe s’acusa e sa crìtica chi faghet a is òmines, is protagonistas berdaderos de custu contu drammàticu a mesu tretu intra de su tempus passadu e unu tempus benidore chi non sunt capassos de bìvere. S’òbera imbetzes est capassa de ingendrare crosidade mescamente pro su coràgiu suo, pro cussa cuscièntzia chi dda ghiat, pro sa punna a castiare in manera crara e sintzilla, sena iscontos nen tzensuras, a is disadatamentos esistentziales de una generatzione intrea. Unu traballu chi Angius est renèssidu a interpretare in manera magistrale sena de rùere mai in sa retòrica.
A pustis de is primas essidas de sa pellìcula in Sardigna in su mese de santugaine, immoe sunt sighende in totu Itàlia is presentadas, cun “Una distributzione foras de is ischemas traditzionales chi a cantu paret est funtzionende bene” – at naradu su regista in custas dies a giru in Itàlia pro giùghere sa pellìcula in totu is salas tzinematogràfica – “e chi est lompende una renèssida manna de pùblicu,un’istima e un’atentu de sa crìtica chi nos faghet praghere mannu”.
Pro nde nàrrere una, sa pinna de gabale de su crìticu tzinematogràficu Pier Maria Bocchi at chèrfidu definire “I Giganti” comente a “sa pellicula italiana de s’annu… sende ca tenet su coràgiu de tocare a punta de gorteddu is freaduras de is màssimos sistemas de su gènere dominadore”.
Is salas fiant totus prenas a is proietziones de su Cityplex Moderno de Tàtari, a su Cinema dei Piccoli de Roma, a su Beltrade de Milanu, a su Lumière de Bologna e a su Nuovo Cinema Aquila de Roma. Salas prenas fintzas in Torinu, Pordenone, Pisa mentras su giru sighit sena pàsida cun unu calendàriu longu de addòbios chi rugrat s’Itàlia de susu a bàsciu.
Po cantu pertocat sa Sardigna, su 11 de santandria “I Giganti “ at a andare in iscena in su Supercinema de Carbònia a incuru de sa Sotziedade Umanitària e su 18 de santandria in s’Ariston de Aristanis. Sa pellìcula at a abarrare in programatzione puru in Tàtari, Casteddu e Nùgoro.
S’ispera e fintzas su consillu est su de andare a tzìnema “pro no istudare custu fogu meravigiosu” chi est giughende sa pellìcula sarda, pro fàghere cumprèndere chi custa boghe sarda est capassa de faeddare a totu su mundu, sena de tìmere sa cuncurrèntzia de pellìculas prodùsidas de is domos tzinematogràficas mannas. Arregordamus puru chi “I Giganti” est istada s’ùnica òbera tzinematogràfica italiana in cuncursu in Locarno e at retzidu su reconnoschimentu de Mellus pellìcula italiana pro su Sindacadu natzionale de is crìticos tzinematogràficos.
Manuela Ennas
