Chi totu sa genti in su mundu tenessit su matessi stili de vida e is matessis consumus de is italianus, sa Dì de su sfrutamentu smodiu de sa Terra iat a essi su 15 de maju. Custa Dì est una data chi ìnditat candu sa pregunta de risorsas e servìtzius ecològicus fata de s’umanidadi in unu annu precisu superat cussu chi sa Terra podit torrai a ingendrai in cussus doxi mesis. Est unu datu cuncordau de su Global footprint network, un’organizatzioni internatzionali de circa ambientali chi càrculat s’Arrastu ecològicu chi sa populatzioni mundiali lassat asuba de su pianeta.
S’Arrastu Ecològicu est unu de is indicadoris prus de importu chi ddoi at oindì po sa contabilidadi de is risorsas biològicas, ca càrculat totu su chi sa genti liat de is logus produtivus (pàsculus, logus de pisca, logus bonus po fraigai, terras bonas de manixai, logus totu matas, logus chi serbint a sperdi su chi bogat su carbòniu.
Segundu is càrculus, s’umanidadi est impreendi sa Terra 1,75 bortas prus a lestru de sa biocapacidadi sua de torrai a ingendrai cussu chi spaciat. Custu bolit nai chi s’umanidadi impreat dònnia annu is risorsas de 1,75 Terras. A dolu mannu, me is annus passaus custu nùmeru est crèsciu sèmpiri de prus e chi sigheus deaici eus a arribai in su 2030 a spaciai is risorsas de duus pianetas.
S‘Itàlia, segundu custus stùdius, iat a tenni abisòngiu de 2,7 Terras e duncas comenti eus giai nau, chi totu su mundu tenessit su matessi cumportamentu suu, su 15 de maju iat a spaciai is risorsas chi sa Terra podit torrai a ingendrai ocannu.
Ddoi at puru chi fait peus de nosu: po is Stadus Unius iant a serbiri 5,1 Terras, po s‘Austràlia 4,5, po sa Rùssia 3,4.
Su Global footprint network at a fai sciri puru, in ocasioni de sa Dì mundiali de s’Ambienti, su 5 de làmpadas chi benit, candu at a essi, ocannu, sa Dì de su sfrutamentu smodiu chi tenit contu de totu is Stadus de su Mundu. S’annu passau sa data fiat su 29 de argiolas. Speraus chi ocannu siat prus a tardu.
Is solutzionis chi podeus agatai po currigiri custu tretu, funt medas, partendi de cussu chi papaus. Difatis, comenti at marcau su Wwf puru, su 80% de is sparessimentus de is spètzias e de is habitat a livellu globali dipendit de is sistemas alimentaris, duncas funt de importu mannu is scioberus nostus in contu de consumu.
Massimiliano Meloni
