De su 2 a su 15 de martzu, po sa dì internatzionali de sa fèmina, Rosadigitale est aparicendi sa de cincu editzionis de “Sa cida de Rosadigitale”. Sa manifestatzioni, in Itàlia e in àterus stadus puru, dd’aprontat su movimentu fundau in Casteddu in su 2015 de Sara Broi, sa presidenti ancora in càrriga. Su movimentu est nàsciu cun sa tarea de si opòniri a is diferèntzias intra de mascus e fèminas, a ddas binci e favoressi sa paridadi po su chi pertocat is traballus de su setori tecnològicu.
‘The conquest is information’ – Sa conchista est a si informai – est su slogan chi ghiat a su movimentu e cumbidat a totus a s’acostai a is setoris de sa scièntzia, de s’ingegneria, de s’informàtica chi fintzas a immoi ddus creint prus de cumpetèntzia de is mascus. Rosadigitale circat de propassai custus stereòtipus aparicendi atòbius po fai connosci mellus su chi funt sa realidadi, is capacidadis e s’abilesa de is fèminas in custus setoris e is esèmpius chi ant donau fèminas de importu in su tempus passau.
Po mori de is arresurtaus otentus me is annus passaus, est a a nai sa bellesa de 1.229 acuntessimentus in Itàlia, in Cànada, Austràlia, Turchia, in Sèrbia, Bulgaria, Ispagna, ocannu puru Rosadigitale megat de apariciai atòbius e laboratòrius, sempiri in s’àndala de ammanniai s’atuamentu a pitzus de is prus argumentus agradèssius a su movimentu. De Casteddu, Rosadigitale est lòmpia fintzas in Amèrica innui, in mesu a is atòbius de formatzioni digitali de s’annu passau, at tentu s’onori de intervistai a Lynn Johnson, cunsiderada un’avanguardista de su fotogiornalismu femininu. Rosadigitale a dònnia acontessimentu ddi narat “folla”, folla de s’arrosa, ma no po su colori de arrosa chi invècias arrapresentat is diferèntzias de genia ma po marcai mellus sa necessidadi de is fèminas de imbucai in cussus setoris e tenni s’arreconnoscimentu chi ddis minescit. Si podit pigai parti a sa cida de Rosadigitale in prus de una manera e po tenni informatzionis in prus bastat a averiguai in su giassu internet www.rosadigitaleweek.com.
Manuela Ennas
