Tocat a dd’acabai de apariciai atòbius e cunvennus cumbidendi òminis sceti e tocat chi is fèminas dd’acabbint de liai parti candu no funt arrapresentadas comenti si spetat. Difatis, ancora oi, incapitat de biri acuntessimentus pùblicus innui de fèminas no ndi ddoi siat mancu una, comenti chi is fèminas no potzant tenni su matessi ruolu de is òminis. Boycottmanels est unu fueddu inglesu chi bolit nai a boicotai is atòbius innui ddoi siant sceti òminis e espressat su sentidu de unu movimentu culturali chi circat de favoressi sa paridadi intra de òminis e fèminas in dònnia setori de sa sotziedadi.
A ddu promovi est stètia Patrizia Asproni, fèmina abista de orìgini nugoresa, presidenti de Confcultura e de sa Fundatzioni Museu Marino Marini de Firentzi. Issa de tempus meda traballat in su mundu de is benis culturalis innui a ddoi traballai funt pruschetotu fèminas, ma funt sèmpiri is òminis a tenni autoridadi e poderis prus artus. Arròscia de custu sistema e straca de si ndi sapiri chi a is fèminas ddas cumbidant a ascurtai sceti, in su mesi de ladàmini passau at bogau a pillu custu fueddu aparicendi un’atòbiu in su teatru ‘La Pergola’ de Firentzi po fai a cumprendi chi est ora de ndi bèssiri de custus stereòtipus, cumbidendi a fueddai sa genti po su valori chi tenit, òmini o fèmina chi siat.
Bortas meda is chi cuncordant is atòbius narant chi no ant agatau fèminas cun cumpetèntzias chi potzant liai parti comenti faint is òminis, ma est fàula. Difatis esistint listas de fèminas cun abilesa in dònnia setori chi fait a agatai puru in sa retza internet, lista fatas pròpiu po cumbati custus sceberus chi lassant a foras is fèminas chena de mòtivus fungudus e prus po una manera de fai chi parit normali ma normali no est. S’arriscu est su de torrai a coa pròpiu immoi chi is fèminas tenint de prus sa possibilidadi de otenni un’istrutzioni e lompint a arresurtaus mannus. Boycottmanels s’est spratu a lestru, gràtzias meda a is retzas sotzialis, arregollendi s’agiudu e s’adduimentu de fèminas e de òminis chi ant detzìdiu de sighiri su cumbidu de Patrizia Asproni a boicotai totu is acuntessimentus innui no bèngiat arrispetada sa paridadi , in s’àndala de un’educatzioni culturali chi no fetzat diferèntzias de genia.
Manuela Ennas
