Règulas pro cuntrastare su Covid a sa torrada in iscola

Ancora pagu tempus e ant a torrare a cumintzare is letziones in iscola. In antis chi ogni iscola donit is indicos de is atividades insoru cun oràrios de intrada e de essida, proamus a bìdere a cales abitùdines e disponimentos nos at a tocare de pònnere in mente.
Prima de intrare in iscola
1)Mesurare sa temperadura de is minores. Si est paris o prus arta de 37,5° su dischente depet abarrare in domo e tocat a intèndere su dutore e, si ddoe sunt sinniales chi fatzant pensare a su Covid, s’indiritzare a su Nùmeru birde regionale.
2)Chi non ddoe at callentura, est a nàrrere chi sa temperadura est prus bàscia de 37,5°, si intrat in iscola sighende sa tabella orària prevìdida. Cando si intrat e si essit tocat a respetare is sinniales cun sa diretzione de martza e a non si firmare mai in is logos de trànsitu.
3) Cando s’abetat in foras in antis de su sonu de sa campana bisòngiat istare a tesu nessi unu metru s’unu cun s’àteru e semper cun s’obrigu de portare sa mascaredda (de is 6 annos in susu). Is dischentes intrant cun òrdine, mègius si unu a sa borta e abarrende semper a tesu de unu metru.
Cando s’istat a iscola
1) In iscola s’intrat cun sa mascaredda.
2) Totu is dischentes de sos 6 annos in susu, durante totu is fainas didàticas, impreant semper.
sa mascaredda cando si depent istesiare de su bancu insoru e sunt in movimentu.
3) Is collaboradores iscolàstìcos podent mesurare sa temperadura de is dischentes cun unu termòmetru a ràgios “infrarossi”.
4) Tocat a si sciacuare is manos cun abba e sabone ogni borta chi si andat a gabinetu, faghende a manera de ddu lassare netu. Tocat a disinfetare is manos cun is prodotos a posta cantu prus possìbile, mescamente a pustis de s’impreu de trastos comunos.
5) Is istudiantes non podent fàghere iscàmbiu de materiale didàticu (libros, cartolàrios, pinnas, lapis, atretzaduras de disinnu) e de àteras cosas (dinari, dispositivos eletrònicos, bestimenta, cosa de papare e bufare, etc.) durante totu sa permanèntzia insoru a iscola.
Atzessu in iscola
1) Is babbos e is mammas, o chie est a su postu insoru, podent intrare a iscola solu si su Dirigente iscolàsticu, is dotzentes o is collaboradores ddos cunvocant a bènnere pro una resone pretzisa.
2) Pro totu is atzessos a iscola tocat a cuntatare in antis is ufìtzios de segreteria cun sa posta eletrònica o a su telèfonu. Cando faghet, est mègius a impreare mèdios de comunicatzione a distàntzia in logu de s’atobiare in iscola.
In prus si a una persona presente in s’iscola ddi benneret callentura o àteros sìntomos acapiados a su Covid-19, depet èssere acumpangiada deretu a intro de unu logu cuncordadu pro custa netzessidade e pro s’apretu e si depet providire luego a sa torrada a domo sua. Si est unu istudiante a isvilupare is sìntomos, su personale incarrigadu a sa vigilàntzia depet mantènnere una distàntzia mìnima de 2 metros e cunvocare sa famìlia. S’iscola tenet su dovere de avèrtere is autoridades sanitàrias cumpetentes o is nùmeros de apretu pro su Covid-19 frunidos de sa Regione o de su Ministeru de sa Salude.
Manuela Ennas