Segundu unu stùdiu Istat imprentau su 9 de làmpadas passau, in su 2021 is famìlias chi bivint in Itàlia ant tentu in mèdia una spesa de 2.437 èurus, cun una crèscia de su 4,7% cunfronta a su 2020. Seus fueddendi de una datu de importu, chi fait bisai chi s’economia siat bessendi de sa crisi ocasionada de s’apedèmia, ma chi no cumpentzat su sciarrocu de sa spesa tentu in su 2020, ca cunfronta a su 2019 sa variatzioni est ancora negativa (-4,8%).
Tocat fintzas a nai chi sa metadi de is famìlias spendint prus pagu meda de su valori mèdiu, ca non superant is 2048 èuros a su mesi.
Sa spesa po su chi no est de papai, cunfronta a su 2020, crescit de su 5,7% e est in mèdia de 1.967 èurus a su mesi. Sa crèscia prus arta (+26,5%) est stètia cussa de is servìtzius po arriciri (posadas, restorantis, tzilleris) chi est stètia de 100 èuros a su mesi e in su 2020 fiat calada de su 38,9% cunfronta a su 2019. Sa spesa po ricreu, spetàculus e cultura crescit invècias sceti de su 5,9% (99 èurus a su mesi; -26,4% in su 2020).
Donniuna de custas duas boxis de sa spesa tenta po su chi no est de papai abarrat atesu meda de is livellus de su 2019 (-22,7% sa prima e -22,0% sa segunda). Custas cosas dd’ant fertas de seguru is smenguaduras de sa socialidadi chi, mancai no grais comenti in su 2020, funt sighidas puru in su 2021.
Crescint fintzas is spesas po is servìtzius sanitàrius e po sa saludi (118 èuros a su mesi, +9,0%). No mudant meda invècias is spesas po Alimentaris e bèvidas analcòlicas cun una parti de sa spesa paris a su 19,3%. Sa parti de sa spesa po sa domu e is bullettas calat de su 38,4% a su 37,4%. Custas ùrtimas duas boxis funt, in dònnia manera, is chi pesant de prus apitzus de sa spesa totali.
Sa crèscia, mancai sparta asuba de totu su territòriu natzionali, no tocat is Ìsulas, chi no registrant nisciuna crèscia de importu. Est prus arta in su Nord (+7,0% su Nord-ovest e +4,4% su Nord-est), sighiu de su Sud (+3,9%) e de su Centru (+3,1%).
Massimiliano Meloni