Chi galu siat chitzo a beru pro cumprèndere ite b’at custu giru a rodeu in Tzina est una de sas pagas cosas chi si podent nàrrere. De su restu s’agetivu prus impreadu pro nos contare custa crèschida de casos de purmonite infantile est “anòmalu”.
Su 21 de custu mese su sistema de sorvelliàntzia de sos mèdias e de sas maladias pùblicas ProMed aiat signaladu focolajos non diagnosticados in grupos de pitzinnos in su nord de su paisu asiàticu.
Est pro custu chi s’Oms, s’organizatzione mundiale de sa sanidade, est pedende informatziones a su guvernu de Pechinu. Ca si sa cosa a su presente no est oriolende meda, beru est finamentas chi, a pustis de su chi b’at acontèssidu cun su Sars CoV 2, mannas sunt sas atentziones de sas istitutziones sanitàrias internatzionales.
Duncas, sa chistione movet dae sas signalatziones de paritzos mèigos tzinesos dae carchi mese interessados dae un’aumentu de maladias respiratòrias. Deretu ant faeddadu de virus influentzales o de covid, ma finamentas de unu batèriu, su Mycoplasma pneumoniae, unu intre sos prus comunes leende in cunsideru sos chi cajonant sas purmonites. Sos pitzinnos manifestant maladias non graes meda ma chi devent èssere sighidas pro evitare una peus cunditzione in contu de sìntomos.
Totu normale duncas? Nono si faeddamus de nùmeros e de ospidales de unas cantas zonas de su paisu (unu paisu prus chi non mannu, ammentemus·nos·lu cada bia chi faeddamus de Tzina) chi ant dèvidu retzire meda prus pitzinnos de su sòlitu.
In su situ de ProMed leghimus de Pechinu e de sa provìntzia de Liaoning, tretos chi nche sunt a tesu s’unu dae s’àteru nessi 800 chilòmetros (cosa chi faghet pensare a unu fenòmenu non limitadu).
E faghende unu giru in sos artìculos de s’imprenta internatzionale de custas dies agatamus àteru. Pro nàrrere, in un’istrutura de sa provìntzia orientale de Anhui, cunforma a una mèdia giornaliera de unos deghe esames, b’at àpidu dies, intre sas coladas, cun una setantina de broncoscopias pro averguare sas cunditziones de sos patzienteddos infetados e s’istadu de infiammatzione a livellu purmonare.
In àteros ospidales, comente in sos de sa costera orientale de su Zhejian, b’at àpidu una crèschida de sas bìsitas pediàtricas de tres bortas cunforma a s’annu coladu (cun unu de tres pitzinnos interessadu dae su mycoplasma).
Semper in ProMed leghimus chi «no est craru cando est chi custa epidemia siat comintzada sende chi diat èssere cosa insòlita unu nùmeru de pitzinnos interessados gasi a lestru». De prus, su raportu «non faeddat de patzientes mannos cundidos, cosa chi faghet a pensare a un’espositzione in sas iscolas».
Duncas, s’Oms at pedidu novas in forma pùblica a su guvernu tzinesu, chi at rispostu pro mèdiu de s’agentzia de imprenta Xinhua. S’artìculu presentaiat unas cantas decraratziones de funtzionàrios de sa Cummissione natzionale de sa salude, chi no aiant rilevadu sa presèntzia de patògenos «noos o istranos».
A bisu de sos guvernantes tzinesos est sugetu chi custos casos siant prus chi non presentes pro more de sa rimotzione de sas limitatziones anticovid. Difatis s’isolamentu longu aiat minimadu sos cuntàgios de influèntzia e de maladias cajonadas dae àteros virus e batèrios comente su Mycoplasma pneumoniae.
Ma b’at galu difidèntzia, in su mundu polìticu e in cussu iscientìficu. «Apo fatu s’errore de mi fidare de sos tzinesos a comintzu de su 2002», narat su viròlogu Roberto Burioni. E Fabrizio Pregliasco annanghet narende chi «podet èssere cale si siat cosa».
S’Oms, custu giru, pedende novas a Pechinu in forma pùblica si nch’at a lassadu a palas sa traditzione de sas comunicatziones diretas e internas. In sas primas fases de su Covid, s’Oms retzeit, difatis, unas cantas crìticas pro no àere pedidu deretu sa trasparèntzia prus manna dae parte de sa Tzina. Como registramus una mudada de assentu.
E pro su restu, a bìdere istemus comente e si evolvet sa chistione epidèmica.
Mauro Piredda
