Ghetadu su bandu pro su Prèmiu ‘Fèmina de scièntzia’ pro su 2020 chi cheret donare unu reconnoschimentu a fèminas de gabale chi apant contribuidu a dare àlchida e importu a sa Sardigna in su setore scientìficu. A ddu cuncordare est s’Assòtziu ScièntziaSotziedadeScièntzia, ghiada dae sa professora Maria Maddalena Becchere, paris cun is Universidades de is Istùdios de Casteddu e Tàtari, s’INAF, s’Osservatòriu Astronòmicu de Casteddu, sa setzione de Casteddu de s’INFN e s’Istitutu de Neuroscièntzias de su CNR de Casteddu.
In sa primu editzione de su 2019 aiant pigadu parte 43 candidadas: intre de issas 12 fiant impegnadas in atividade de chirca a s’èsteru (tra Zurigu, Marsìglia, Varsàvia, Nantes, Darmstadt, York, San Diego, Lione e Cambridge), 4 fiant professoras ordinàrias, 4 professoras assotziadas e fintzas un’abogada esperta in informàtica giurìdica. Is disciplinas de cumpetèntzia sunt istadas mescamente biologia, chìmica, scièntzias biomèdicas, informàtica, astrofìsica, meighina e fìsica.
Sa giuria de su Prèmiu tenet a presidente sa professora Carla Romagnino a nùmene de s’Assòtziu ScièntziaSotziedadeScièntzia e nde faghent parte sa professora Maria Del Zompo, Magnìficu Retore de s’Universidade de Casteddu, sa professora Giulia Ceccherelli, professora assotziada de Ecologia in su Dipartimentu de Chìmica e Potecaria de s’Universidade de Tàtari, sa dotora Marta Burgay in rapresentàntzia de s’INAF-OAC, su professore Giuseppe Mezzorani, in rapresentàntzia de s’INFN sez. de Casteddu, sa dotora Silvia Ròida Brusin de TG Leonardo (RAI), sa professora Valentina Savona, dirigente iscolàsticu de su Litzeu Scientìficu Pacinotti de Casteddu e sa dotora Annalisa Muntoni, responsàbile de s’Istitutu de Neuroscièntzias de su CNR in su Polu Universitàriu de Pauli.
Podent presentare dimanda pro issas etotu totu is fèminas interessadas opuru inditende àteras fèminas sa presidente de s’Assòtziu ScièntziaSotziedadeScièntzia , is diretores de is dipartimentos universitàrios scientìficos de Casteddu e de Tàtari, is diretores de s’INFN setzione de Casteddu e de s’INAF-OAC, is dirigentes iscolàsticos de is iscolas sardas, is responsàbiles territoriales pro sa Regione Sardigna de is assòtzios de dotzentes de disciplinas scientìficas, comente s’A.I.F., s’A.N.I.S.N., su C.R.S.E.M., sa Partzidura Didàtica de sa S.C.I., sa moderadora de Gi.u.li.a. Giornalistas Sardigna e sa binchidora de sa primu editzione, professora Giovanna Puddu.
S’Assòtziu ScièntziaSotziedadeScièntzia promovet fainas pro difùndere e isparghinare sa cultura scientìfica avalorende sa relata intra de fèminas e scièntzia sende chi sa paridade de gènere, nointames is resurtados e is resèssidas de is fèminas in is ùrtimos annos a livellu locale, natzionale e internatzionale, benit ancora cunditzionada, in sa comunidade scientìfica puru, de is istereòtipos e deaici is fèminas sighint a tènnere dificurtades in sa chirca, in is publicatziones scientìficas e in su reconnoschimentu de su traballu issoro.
Tocat a intregare is dimandas intro su 10 de cabudanni cun posta eletrònica a premiodonna2020@gmail.com. Pro totu is àteras informatziones chi pertocant su Prèmiu faghet a sighire custu ligàmine www.festivalscienzacagliari.it.
Manuela Ennas
