Me is diis passadas est lòmpiu de su Consillu Regionali su documentu chi firmat po tres annus sa pisca de s’arritzoni. Sa chi est po cumentzai est duncas s’ùrtima stajoni po ddus piscai. Sa proposta dd’ant fata is de ‘Fratelli d’Italia’, ma tocat a nai chi sa chistioni contras a sa pisca de s’arritzoni dd’iant giai aberta assòtzius ambientalistas po pediri pròpiu de firmai custa genia de pisca.
Ma sa de immoi est una firmada istitutzionali sendi chi su Consillu regionali at aprovau s’emendamentu chi iat presentau Francesco Mura, detzidendi de firmai po tres annus sa pisca de s’arritzoni e de donai arrègulas e ìnditus crarus po su benidori.
A arregulai custa detzisioni est sa lei ‘Omnibus‘, chi in s’artìculu 8 previdit chi “cun decurrètzia de sa de sessanta diis de s’intrada in vigèntzia de su provedimentu, est proibiu a piscai, boddiri ari e bendi is arritzonis de mari fintzas a su 30 de su mesi de abrili de su 2024”. S’arrexoni de custu provedimentu dd’agataus “in s’arriscu de estintzioni de custa resursa, un’arriscu sèmpiri prus mannu po nexi de s’arregorta foras de contu fata in is ùrtimus dexi annus”.
“Custu provedimentu – at narau Mura – dd’eus cumpartziu cun una truma de piscadoris professioneris, chi funt stètius is primus a si nd’acatai chi s’arritzoni est a arriscu de estintzioni”. Is circas scientìficas puru ant ammostau chi su mari a ingìriu de sa Sardìnnia est sunfrendi meda. Sa tarea duncas est cussa de amparai is arritzonis e de amparai aici s’ambienti innui bivint, cun un’ograda de importu a sa sustenibilidadi.
Cunsiderada sa firmada e su dannu chi podit portai a su setori de is piscadoris, sa Regioni Autònoma de Sardigna at prevìdiu de donai leugu e totu a is piscadoris un’agiudu in dinai de sescentus milla èurus e prus de unu millioni po is annus 2022 e 2023.
Is piscadoris, in càmbiu, s’ant a depi ocupai d s’allichidimentu de su fundali de su mari po totu su tempus de sa firmada. In su mentris is operadoris ant a assegurai puru òberas e fainas po averiguai chi is cunditzionis de su mari funt melliorendi e chi funt torrendi a nasci arritzonis bastantis.
Manuela Ennas
