Claudia Aru est una de is prus cantadoras famadas de Sardìnnia. Carrera nd’at fatu meda po lompi a is arresurtaus de oi, de sa làurea in Stòria de s’Arti in s’Universidadi de Bologna a is stùdius de mùsica jazz in sa scola “Taller de Musics” de Barcellona, a is stùdius de cantu in New York. At sceberau de torrai in Sardìnnia in su 2008 e at donau vida impari a Arrogalla, alias Francesco Medda ,a sa truma eletro-folk “Bentesoi” publichendi duas arregortas, Tripland e Folk You, cun sa collaboratzioni de artistas comenti Elena Ledda, Benito Urgu, Rossella Faa, Sa Razza, Randàgiu Sardu e àterus meda.
A pustis de custas fainas at inghitzau a traballai a sola, cun una truma totu sua, e in su 2012 est bessiu “Aici”: spanniolu, italianu, ingresu funt is lìnguas chi Claudia impreat in custu traballu, ma est su sardu a donai t a su discu cussa biatzesa nodida e originali, acumpangiada de su rìtimu de gèneris musicalis diferentis ammesturaus a pari, cun unu sentidu internatzionali e in su matessi tempus identitàriu e sardu schetu. E cun sa fama chi crescit e dda portat a cantai e a sperimentai in totu su mundu, sighit sa produtzioni cun “A giru a giru” in su 2013, “Momoti” in su 2015 e “Aru” in su 2019.
Immoi, mancai siaus in tempus de apedèmia po nexi de su Covid e a pustis de ai publicau s’annu passau “Arrò du Covid” po donai unu sinniali forti in unu mamentu de dificurtadi po totus e po is artistas sardus puru, Claudia Aru no tenit nisciuna bidei de si lassai firmai de su virus e est incarrerendi, pròpiu in custas diis, unu progetu nou, Nur -rock and stones. Totu est nàsciu ca su tzìrculu de is sardus de Vercelli at preguntau a Claudia de cuncordai unu cuncertu de podi sighiri in lìnia, sendi chi cun custu Covid no si sciit candu eus a torrai a gosai de atòbius in presènsia.
E insaras Claudia no s’est fata pregai e antzis at pensau de ammanniai custa bidei e de cuncordai una faina chi pongat impari s’arti sua a sa bellesa e a sa richesa de sa Sardìnnia, e mescamenti de is logus de importu stòricu e archeològicu. Po fai intendi prus acanta de domu is sardus chi no podint torrai in sa terra insoru e ammostai a is tràngius su patrimòniu nostu cun sa spera chi potzant benni luegu a ddu biri e apretziai de acanta.
Su chi ndi bessit est una pellìcula curtza chi cojat s’imbentu de s’artista cun unu messàgiu chi movit de su passau e si ghiat in su benidori cun sa mùsica e s’alentu suus. S’incingiadura de Nur- rock and stones est po sàbudu, su 10 de abrili, in su canali youtube de Claudia Aru, cun su primu cuncertu arregistrau in su nuraxi Genna Maria de Biddanoa ‘e Forru .Sa regia est de Marco Camba e ant collaborau Pietro Medda po is sonus e Anna Lapa po s’imbellitadura. Invècias impari a Claudia sonant su bassu Matteo Marongiu, su violinu Simone Soro, is ghitarras Matteo Demuro e su pianoforti Simone Sassu.
Manuela Ennas
