Su sardu Nicola Bartolini at bintu su tìtulu de campioni in su Mundiali de ginnàstica artìstica de Kitakyushu, in Giaponi. Su ginnasta est lòmpiu a unu puntègiu de 14.800, lassendi agoa su giaponesu Kazuki Minami e su finlandesu Emil Soravuo.
Nicola Bartolini, giòvanu de 25 annus originàriu de Sant’Aleni, fiat liendi parti po sa primu borta a sa finali de unu mundiali e po sa primu borta in sa stòria de sa ginnàstica italiana un’atleta at bintu sa medàllia de oru in sa disciplina a corpus lìberu. Po s’ùrtima emotzioni in contu de custu sport tocat a torrai a su 1997, candu in Losanna Jury Chechi iat bintu su campionau de su mundu de ginnàstica artìstica po òminis a is aneddus.
“Seu arrennèsciu campioni de su mundu, seu campioni de su mundu” – at nau Nicola prus de una borta, ca no ddi pariat ancora berus de essi lòmpiu a un’arresurtau aici de importu – “No agatu fueddus po arrennesci a nai ita arratza de cuntentesa chi portu. Gei est stètiu difìtzili, perou apu fatu s’esercìtziu giustu in su mamentu giustu. Ma depu nai chi fintzas sa sorti m’at agiudau , e sa sorti serbit sèmpiri. Bollu torrai gràtzias a totu sa truma de su tzentru tènnicu de Milanu e mescamenti a su presidenti de sa Federatzioni”.
“Apu scritu sa stòria de sa ginnàstica artìstica italiana. Immoi m’iant depi fai asumancu una stàtua”, at nau brullendi. “Custa medàllia dda bollu dedicai a sa famìlia mia, a sa sposa mia, a s’allenadori Paolo Pedrotti, a Alberto Busnari, a is chi funt impari cun mei in Giapone e a Paolo Bucci, chi m’at donau sèmpiri una manu de agiudu”.
Sa carriera Nicola dd’iat incingiada cun is mundialis de Nanning, in Cina, in su 2014, ma po una sèrie de incidentis no fiat arrennèsciu a liai parti a is Olimpiadis de Rio de Janeiro in su 2016 e a is de Tokyo 2020. Bartolini iat fintzas pensau de dd’acabai cun su sport ma s’alentu dd’at portau a essi oi intra de is prus mannus e s’ìsula sua afestat custu prexu impari a issu.
Manuela Ennas
