Ulìana no tenit nisciuna bidei de si lassai firmai de s’apedèmia e torrat a ponni in motu sa machina de s’economia de sa bidda partendi de su binu. Difatis, a pustis de una primu editzioni cun arresurtaus spantosus e sa firmada po curpa de su Covid-19, torrat Nepentes, una manifestatzioni dedicada a su prus binu identitàriu de Ulìana e a is produtoris chi de annus traballant in su setori. S’atòbiu, chi funt cuncordendi po su mesi de austu in sa baddi de Lanaitho, dd’ant torrau a pensai cun una fòrmula innovativa po agatai prus adduimentu in unu de is mamentus prus difìtzilis de sa stòria de is ùrtimus annus. S’avisu po sa seletzioni e su sceberu de is binus de is cantinas privadas dd’ant giai publicau e ddoi ant a podi liai parti totu is produtoris de Ulìana. Pustis is organizadoris ant a pigai unu pagu de is binus iscritus a partecipai e dd’ant a tenni allogau fintzas a sa dii innui dd’ant a tastai in manera ufitziali in s’aposentu de sa cantina sotziali.
In sa giuria ddoi ant a essi assentaus espertus e tastadoris de Ais e Onav, assòtzius chi imparant a tastai e arreconnosci sa calidadi de su binu, e in prus amantiosus e studiosus de sa matèria po donai vida a unu cunvennu po fueddai e arrexonai impari de is prospetivas e is ipotesis po avalorai su Nepente in su benidori. Totu, organizadu in collaboratzioni cun sa sotziedadi Galaveras e su Tzentru cummertziali naturali de Ulìana, at a acontessi in su paisu de su Corrasi, chi portat a innantis custa traditzioni cun su faimentu de su binu ‘in domu’ de sèculus. “Iat a podi parri pagu assetiau su pensai a manifestatzionis in una stajoni comenti custa innui is fainas funt serrendi e genti meda s’ammalàidat, ma est doveri nostu pensai a su chi at a benni a pustis e seus segurus chi s’avaloramentu de is prodotus tìpicus nostus siat su tretu giustu de sighiri po torrai a nd’arrecuperai su pèrdiu”, at narau Antonio Congiu, assessori po sa Laurera de su Comunu de Ulìana.
“Cun custa faina comenti a amministradoris boleus donai unu sinniali de importu e boleus chi de Ulìana si potzat spainai in totu s’ìsula: torrai a movi puntendi a su chi teneus, avalorendi is produtus nostus, is saboris nostus e is coloris nostus e pruschetotu s’identidadi nosta – at aciuntu s’assessori po su Turismu Guglielmo Puligheddu – Su tempus chi eus passau acorraus indomu po nexi de su Covis dd’eus impreau po agatai oportunidadis noas po si ndi torrai a strantaxai. Teneus idei de apariciai àteras fainas in is mesis imbenientis sèmpiri cun sa tarea de una rinàscida cuncreta. Is percursus, fintzas is prus spinosus e traballosus, tocant fatus , mancari cun is cautelas netzessàrias, ca a s’arrendi iat a essi unu disacatu ancora prus mannu po totus”.
“Non conoscete il Nepente d’Oliena neppure per fama? Ahi, lasso! Io son certo che, se ne beveste un sorso, non vorreste mai più partirvi dall’ombra delle candide rupi, e scegliereste per vostro eremo una di quelle cellette scarpellate nel macigno che i sardi chiamano Domos de Janas, per quivi spugnosamente vivere in estasi fra caratello e quarteruolo.” Aici cumentzàt a ndi scriri su poeta famau Gabriele D’Annunzio in su 1909 po sa ghia ‘Osteria. Guida spirituale delle osterie italiane da Venezia a Capri’ de Hans Barth, contendi de candu dd’iat tastau in unu biaxi in Sardìnnia cun àterus scritoris e amigus e cantendi-ndi is virtudis suas. Is caraterìsticas ùnicas de custu binu cannonau, arrùbiu che rubinu, forti e durci in su matessi tempus, ddas ant arremonadas in is òberas insoru Gràssia Deledda e Salvatore Satta puru ca su primori suu est connotu e apretziau de is tempus antigus.
Manuela Ennas
