Musica sulle bocche, intra de jazz, cultura e sustenibilidadi

Torrat su jazz de calidadi cun “Musica sulle bocche”, cun sa bellesa de bintiseti cuntzertus in sexi comunus de sa Sardìnnia, aìnturu de unu fèstival chi at a propònniri mùsica internatzionali po totu su mesi de austu avalorendi dexenoi logus diferentis e spantosus de s’ìsula nosta. De su primu a su bintinoi de austu, partendi de is marinas de Vignola a sa Basìlica in stili romànicu-pisanu de Saccàrgia in territòriu de Codronzanu, de Casteddu Sardu a su casteddu de Tzaramonte, de sa crèsia de Santu Antiogu de Bisàrciu in Otieri a su putzu sacru de Nulvi, de sa foxi de su flùmini Coghinas in Codaruìna a sa crèsia romànica de San Pietro delle Immagini in Bultzi, e ancora de su tzentru stòricu de S’Alighera e is sartus de sa Gaddura, sa de bintunu editzionis de su fèstival internatzionali “Musica sulle bocche”at a portai sa mùsica jazz in custus iscenàrius ùnicus de scoberri.

Su fèstival dd’est cuncordendi s’assòtziu Jana Project cun sa diretzioni artìstica e sa ghia de Enzo Favata. At a fai ascurtai artistas de importu de s’iscena jazz comenti a su percussionista Trilok Gurtu (in iscena paris cun sa truma The Crossing de Enzo Favata), su percussionista Mino Cinélu impari a su sonadori de trumba Nils Petter Molvaer, sa truma de su sassofonista Seamus Blake, is musicistas Giorgio Li Calzi e Manuel Zigante e sa violinista Anais Drago in su cuntzertu traditzionali a s’orbescidroxu de domìniga 22 de austu. Protagonistas de custa editzioni ant a essi puru artistas chi ant fatu sa stòria de su jazz in Itàlia comenti a su baterista Roberto Gatto (su 11 de austu in Costa Paradiso) e sa cantanti Ada Montellanico acumpangiada de su pianista Enrico Zanisi ( su 29 de austu in Tergu), paris cun artistas stòricus de sa mùsica italiana comenti a Mogol e s’Orchestra Medit Voices (su 26 de austu a S’Alighera), sa truma de Peppe Servillo, Javier Girotto e Natalio Mangalavite (su 17 de austu in sa foxi de su Coghinas, Codaruìna) e a mùsicus famaus comenti a Francesco Orio e Vittorio Cuculo (in Sènnaru su 16 de austu), is ghitarristas Paolo Angeli (su 19 a Màltis) e Marcello Peghin (su 23 a Laerru) e sa violinista Luciana Elizondo (in sa parti de aìnturu de sa basìlica de Saccàrgia in Codronzanu su 28 de austu).

Ocannu is organizadoris ant bòfiu donai prus importu a is comunus e is territòrius chi ant sceberau de liai parti a su fèstival, tanti chi sa cunferèntzia de imprenta po presentai totu su programma dd’ant cuncordada in Tàtari, in sa Càmera de Cummèrciu, e no prus in Casteddu comenti fiat acontèssiu in passau po is àteras editzionis. Sa tarea est pròpiu sa de ammostai chi su fèstival podit essi puru una manera de ndi pesai una comunidadi ativa e una retza ponendi impari mùsica, cultura e sustenibilidadi e donendi sa possibilidadi a s’economia puru de s’afortiai, pruschetotu in custus tempus de dificurtadi po nexi de su Coronavirus. Sa Càmera de Cummèrciu difatis at detzìdiu de agiudai e finantziai su fèstival promovendi “Salude&Trigu”, unu programma de promotzioni turìstica de totu is atòbius culturalis e traditzionalis de su Nord de sa Sardìnnia, po ponni in motu unu protzessu de svìlupu locali e cumpartzidura de progetus pensaus po ammanniai e melliorai is servìtzius de totu su territòriu. Su progetu de custa editzioni difatis ponit impari logus chi po su prus de is bortas abarrant foras de is circùitus turìsticus e culturalis prus connotus, cun s’ìdei chi invècias iat a tocai a ddus fai connosci e apretziai, fintzas po mori de sa mùsica e de su jazz, po is calidadis insoru, capassas de ingendrai crosidadi me is turistas. Po is chi bolint liai parti a is cuntzertus, fait a agatai totu su programma sighendi custu ligàmini eventi.musicasullebocche.it

Manuela Ennas

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Total
44
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
44
Share