De una pensada de s’assòtziu culturali Asteras (Assòtziu Territòriu e Arti in Sardìnnia) est bessida de pagu tempus una ghia chi ammostat a innui totu andai po biri is prus murales de importu de sa Sardìnnia. Unu biaxi po scoberri s’ìsula po mori de sa street art, una forma artìstica pùblica capassa de mudai sa bisura de biddas e citadis, chi est ammanniendi-sì sèmpiri de prus me is ùrtimus annus.
Cun prus de 400 pàginas de fotografias, informatzionis, analizus e mapas “Muri di Sardegna” est giai giai un’entzicropedia chi pinnigat totu su mundu de sa street art e ndi bogat a pillu is particularis e is piessignus chi dda faint ùnica. Su progetu, cuncordau de Ivana Salis, Gianfranca Loi, Barbara Catte, Elisabetta Borghi e Massimiliano Frau e imprentau de Dario Flaccovio Editore cun s’agiudu de is Comunus interessaus, tenit sa punna de fai connosci custa arti cuntemporànea e de comenti potzat essi unu trastu po donai un’àtera cara a su paesàgiu urbanu, sotziali e culturali. Su de Sardìnnia est diaderus unu patrimòniu mannu e nodiu chi est otenendi consìderu, arriconnoscimentus e atentu de is artistas, de is operadoris, de is crìticus de arti e de totu is movimentus artìsticus chi ponint sa circa sotziali intra de is tareas e de is fainas insoru.
Su lìburu podit arresurtai ùtili no sceti a is turistas, ma a is sardus puru e, po is dimensionis chi tenit, est fàtzili a si ddu portai avatu e add’impreai po andai a sa scoberta de un’àtera Sardìnnia, in prus de sa chi seus acostumaus a biri in sa publicidadi. Difatis custus murus pintaus contant meda de prus, contant de una terra, de una stòria, de unu connotu, de sentidus e de speras po su benidori, de unu pòpulu chi intregat a sa pintura muralìstica su rolu de portai a totus un’ambasciada. A bortas fintzas de dda tzerriai a manera chi sa sotziedadi dd’ascurtit e cumintzit mancai a dda tenni in contu.
Pustis de una parti introdutiva chi spricat mellus su fenòmenu de su muralismu, sa nàscida sua in Sardìnnia me is annus ’60 e su svilupu chi at tentu fintzas a oi, su lìburu si portat a bellu a bellu aìnturu de is prus biddas famadas cun ventanas dedicadas a is murales e a is artistas chi ant sceberau custa manera de espressai s’arti insoru. De Santu Sparau a Orgòsolo, de Tonara a Santu ‘Èngiu, passendi de Aligi Sassu a Manu Invisible, de Pinuccio Sciola a Tellas, de Antonio Pilloni a Ericailcane, de Francesco Del Casino a Pina Monne, de Diego Asproni a Giorgio Casu, in unu intretzu de visionis e stilis diferentis ma acapiaus a pari de cussu alentu chi at fatu de sa Sardìnnia unu baluardu de su muralismu, donendi-ddi tanti facis e emotzionis de contai.
Manuela Ennas
