Is màginis de su fogu chi is diis passadas ant mudau sa bisura de su Montiferru ddas teneus ancora craras me is ogus. Ma a ddas contai cun ogus diferentis, po fai manera de no si ndi scaresci prus, at a essi su regista Enrico Pau chi est giai traballendi a una pellìcula. Su chi at fertu su Montiferru est unu dannu foras de contu. Unu fogu chi at spèrdiu padentis, olivàrius, e istruvina de modditzi, olioni, murdegu, ollastu, murta. Unu fogu chi at mortu animalis, chi at abruxau aziendas de messarìtzia, chi at torrau a nudda su traballu de una vida po genti meda.
De is mamentus de disisperu chi ant bìviu is de su logu e totu is sardus impensamentaus po sa terra insoru, nd’at a fueddai Enrico Pau in “L’ombra del fuoco“, su docufilm chi est cuncordendi cun sa tarea de donai boxi a chi at patiu custu degòlliu e arregolli is màginis de su chi est abarrau a pustis de su fogu. Impari a issu una truma de giòvanus chi traballant giai in su mundu de su tzìnema, Pietro Medda po sa fotografia e su montàgiu, Federico Montaldo po is ripresas, Claudia Emily Pau e Gabriele Muscas, assistentis. Su traballu est cumentzau sighendi Gianluigi Bacchetta, dotzenti e diretori de s’Ortu Botànicu de Casteddu, me is averiguamentus fatus in totu sa zona, e documentendi sa fasi a pustis de custu bisestru.
Su pellìcula difatis bolit ponni impari is testimonias de is protagonistas de custus mamentus cun sa punna de intregai a su benidori unu documentu de importu de cantu est acuntèssiu. Po cumprendi cantu siat mudendi sa relata intra de òmini e naturalesa, cantu siat dannàrgiu su ponni fogu, cantu acadessimentus che custu potzant giambai su cursu de sa stòria e sa bisura de unu territòriu. Custu traballu at a contai puru sa fortza chi sa genti de su Montiferru est ammostendi de luegu etotu e cantu siat difìtzili a si ndi torrai a strantaxai a pustis de un’infàmia aici.
Manuela Ennas