Su Decretu Iscola n. 22/2020 cumbertidu in lege de sa lege n.41/2020, faghet suo su sentidu de is chi sunt contràrios a su votu numèricu pro s’avaloramentu iscolàsticu. Difatis de ocannu is iscolas ant a valutare is pipios in itinere sena de votu numèricu e a s’acabbu de su cuadrimestre cun giudìtzios descritivos pro ognuna de is disciplinas de istùdiu. Ma s’iscola e sa sotziedade ant a èssere prontas pro unu pagella chena de nùmeros? At a bastare un’artìculu de lege pro mudare su sistema de avaloramentu chi aiat torradu a pònnere sa ministra Gelmini in su 2008?
A dolu mannu paret de nono, mancari custu potzat pàrrere unu mamentu utilosu pro una averguada de sa cultura e de sa pràtiga de abbalorinzu dominada, difatis, de sa misuratzione e de una forma de ossessione de su votu. Amus bidu in su perìodu de sa serrada pro curpa de sa pandemia de su Coronavirus, chi est possìbile e cumbeniosu valutare non is aprendimentos petzi, ma is metodologias e sa manera de aprendere puru ca is iscolas funtzionant bene fintzas sena ricùrrere a s’arma de su votu.
Ligi puru: Iscola: de su votu numèricu a su giudìtziu
De seguru no at a bastare un’artìculu de lege pro pòdere lòmpere a unu giambamentu efetivu in pagu tempus. Pruschetotu b’at bisòngiu de una cultura de s’avaloramentu pedagògicu e de una pràtiga cumpartzida, adeguada e coerente, caraterizada de cumpetèntzias comunicativas e de relatas de livellu artu. Custu sena ismentigare chi, in unu progetu de avaloramentu comente un’òbera aberta e in fieri, is atores depent èssere is istudiantes e is famìlias. Tocat a liberare s’esperièntzia de avaloramentu de is pregiudìtzios e de sa tirannia de is votos. Sunt netzessàrios fintzas s’esercìtziu fitianu de unu giudìtziu capassu de nde pesare resonamentos e sa pràtiga de s’auto-avaloramentu comente unu meledu crìticu in s’aprendimentu. Is pipios, difatis, non bisòngiant de istimare is èsitos de is aprendimentos cun nùmeros, ma de intèndere s’incoragiamentu, de èssere acumpangiados, apretziados, aprobados de is mannos e de is cumpàngios, iscoberrende su gustu de imparare sena de tènnere timoria de su votu. A is pipios ddis interessat sa satisfatzione de imparare, est a nàrrere de retzire e averguare respustas a is dimandas insoru. Ogni pipiu bisòngiat de su giudìtziu, non de sa medida. Cheret imparare a si connòschere e a si riconnòschere in s’ograda de chi est in relata cun issu, mescamente in is figuras de sa famiìlia e de s’iscola.
In sa pràtiga, su giudìtziu descritivu at a sighire unu critèriu basadu subra bator livellos de aprendimentu, est a nàrrere:
- Avansadu: cando s’alunnu batit a crompimentu is compitos in situatziones connotas e noas, in manera autònoma e cun continuidade;
- Intermèdiu: cando s’alunnu batit in situatziones connotas in manera autònoma e cun continuidade ; risolvet compitos in situatziones noas non de sighida e non semper in manera autònoma;
- Base: cando s’alunnu batit a crompimentu is compitos solu in situatziones connotas siat in manera autònoma ma non de sighida , siat in manera no autònoma, ma cun continuidade;
- In bia de primu achirimentu: cando s’alunnu batit a crompimentu is compitos solu in situatziones connotas e isceti cun s’agiudu de su dotzente o impreende ainas apòsitu.
Manuela Ennas
