A sa torrada in iscola a pustis de is vacàntzias de Paschixedda sunt mudadas is règulas pro sa gestione de su Covid in su mundu de s’iscola. Su decretu-lege n.1/2022 at istabilidu comente at a tòcare a gestire sa presèntzia de alunnos positivos in is classes ; ìndicos e acrarimentos ddos at donados sa Nota cumpartzida 08/01/2022 n.11 de su Ministeru de s’Annestru e de su Ministeru de sa Salude e sa Nota de su Ministeru de s’Annestru 10/01/2022 n.14. Is modalidades càmbiant a segunda de s’edade de is istudiantes e si ant fatu o nono su vatzinu.
Iscola de sa pitzinnia
In s’iscola de sa pitzinnia bastat sa presèntzia de un’alunnu positivu petzi pro suspèndere is sa fainas didàticas de sa classe, is pipios andant in cuarantena 10 dies e a s’acabbu de sa cuarantena podent torrare in iscola a pustis de àere fatu unu tampone cun resurtadu negativu.
Iscola primària
In s’iscola primària, cun sa presèntzia de un’alunnu positivu in classe s’iscola non tocat a suspèndere is fainas didàticas ma is pipios depent fàghere deretu unu tampone, de torrare a repìtere a pustis de chimbe dies. Is alunnos duncas sighint a frecuentare is letziones ma cando papant depent abarrare a tesu de a su mancu 2 metros s’unu de s’àteru.
Cun sa presèntzia de duos o prus positivos, totu sa classe andat in cuarantena deghe dies e s’iscola ativat sa didàtica a distàntzia. A s’acabbu de sa cuarantena is pipios podent torrare in classe a pustis de àere fatu unu tampone cun resurtadu negativu.
Iscolas segundàrias de primu e segundu gradu e formatzione professionale.
In is iscolas segundàrias de primu gradu, in is iscolas segundàrias de segundu gradu e in su sistema de annestru e formatzione professionale, cun sa presèntzia de unu positivu sa faina didàtica sighit in presèntzia pro sa classe e is alunnos tenent s’òbrigu de portare is maschereddas Ffp2 a su mancu 10 dies. Is pitzocos podent papare in classe petzi si faghet a mantènnere una distàntzia de a su mancu 2 metros s’unu de s’àteru.
Cun sa presèntzia de duos positivos in sa classe sa situatzione est diferente a segunda chi is alunnos siant vatzinados o non siant vatzinados. A is chi no ant fatu is duas doses de vatzinu, chi ant fatu is duas doses de prus de 120 dies o chi sunt sanados dae su Covid de prus de 120 dies e no ant fatu ancora sa dose de afortiamentu ddis tocat sa cuarantena de 10 dies e s’iscola ativat sa didàtica digitale integrada.
A s’acabbu de sa cuarantena is istudiantes podent torrare in classe a pustis de àere fatu unu tampone cun resurtadu negativu. Is alunnos chi imbetzes ant fatu is tres doses de vatzinu, chi ant fatu is duas doses de prus pagu de 120 dies o chi sunt sanados dae su Covid de prus pagu de 120 dies sighint sa didàtica in presèntzia ma tenent s’òbrigu de portare is maschereddas Ffp2 a su mancu 10 dies. Gasi etotu is alunnos podent papare in classe petzi si est possìbile abarrare a tesu de a su mancu 2 metros s’unu de s’àteru.
Cun sa presèntzia de tres o prus positivos s’iscola ativat sa didàtica a distàntzia. Sa durada de sa cuarantena est diferente a segunda chi is alunnos siant vatzinados o non siant vatzinados e, pro is vatzinados, a segunda de is doses de vatzinu chi ant retzidu.
Is non vatzinados, is chi ant fatu una dose de vatzinu petzi o ant fatu is duas doses de prus pagu de 14 dies depent abarrare in cuarantena 10 dies e a s’acabbu de sa cuarantena serbit unu tampone cun resurtadu negativu.
Is alunnos chi ant fatu is duas doses de prus de 120 dies, si non mustrant sinniales de maladia, depent abarrare in cuarantena 5 dies e a s’acabbu de sa cuarantena serbit unu tampone cun resurtadu negativu.
Is alunnos chi non mustrant sinniales de maladia, chi ant fatu is tres doses de su vatzinu, chi ant fatu is duas doses de prus pagu de 120 dies o sunt sanados dae su Covid de prus pagu de 120 dies non depent fàghere peruna cuarantena.
Massimiliano Meloni
