Su mesi de cabudanni est su mesi de su cumentzu de sa scola a s’acabbu de is fèrias de s’istadi. Est berus, pustis duus annus de apedèmia is alunnus e is studentis ant a podi torrai a scola in una situatzioni giai-giai de normalidadi ca s’apretu po su Covid parit apaxiau. Is problemas de sa scola perou funt sèmpiri is matessis e su Covid ddus at ammanniaus puru.
Pròpriu in custa diis Save the Children Itàlia at imprentau una circa apitzus de sa scola italiana (Circhendi su tempus pèrdiu), chi ammostat comenti in sa scola nci funt tropus diferèntzias. Sa circa partit de unu datu de importu, est a nai sa crèscia, me is ùrtimus annus, de sa poberesa assoluta intra de is minoris de edadi: de su 13,5% in su 2020 seus passaus a su 14,2% in su 2021, cifra chi furriada in nùmerus bolit nai 1 millioni e 328 milla minoris poberus. Sigumenti ddoi at una relata intra de poberesa assoluta e poberesa educativa, custa cosa at fatu ammanniai sa percentuali de minoris chi lassant sa scola prima de su tempus. In su 2021 sa percentuali de bessida de su sistema educativu prima de su tempus est stètia de su 12,7%. Custa cosa ponit in pensamentu po duas arrexonis. Sa primu est chi seus atesu meda de sa tarea posta de su Consillu de s’Unioni Europea, chi est de lompi intra de su 2030 a una percentuali de bessida de sa scola de su 9%. Sa segunda est chi seus intra de is ùrtimus in Europa, ca faint peus de nosu sceti s’Ispànnia e sa Romania.
A dolu mannu sa scola patit problemas chi benint de su tempus passau e ddi tocat a cumbati s’isfida de s’emergèntzia educativa cun pagus resursas. In prus a is famìlias prus poberas, po nexi de s’inflatzioni dd’at a tocai a smenguai sa spesa po s’istrutzioni. Seus chistionendi de unu problema sociali e econòmicu mannu, chi at a fai medas dannus in su benidori. Giai oi difatis su 23% de is giòvunus faint parti de sa categoria sociali chi ddi narant Neet est a nai is chi tenint de 15 a 29 annus e no stùdiant e no traballant nimancu. Custa percentuali est sa prus manna in Europa.
Massimiliano Meloni
