Is previsionis de crèscia econòmica po s’Ocse

S’Ocse, s’Organitzazioni po sa coperatzioni e s’isvilupu econòmicu, at imprentau cida passada s’Economic outlook, unu documentu de importu in contu de su chi si pensat at a acuntessi a s’economia in su benidori. Po su chi pertocat s’Itàlia is novas no funt bellas ma nimancu deaici malas comenti timiant medas economistas. Difatis sa timoria manna fiat cussa de un’intrada in recessioni, cun s’economia chi iat ai smìtiu de cresci.

Invecis si pensat chi s’economia at a cresci, mancai de pagu, ca s’at a firmai a unu +0,2%. Est una cosa chi podit parri de arriri, ma po imbestidoris, bancas e organizatzionis finantziarias no est cosa de pagu contu, ca su sìnniu + invecis chi su sìnniu – ananti de sa boxi “crèscia” est cosa chi donat spera e fait beni a totu s’economia de unu Stadu. Tocat a nai puru chi custa crèscia de su 0,2% de su Pil abàsciat sa previsioni de su Guvernu, chi in su Documentu de economia e finàntzia dda fissat a su 0,6% po su 2023.

Su Pil de ocannu, invecis, est cunfirmau in crèscia de su 3,7%. Pustis unu 2023 aici aici, sa cosa at a andai mellus in su 2024 cun su Pil chi a bellu a bellu at a lompi a +1%.
Is arrexonis de custa frenada funt is problemas chi seus bivendi giai oi. Po primu cosa ddoi est s’artziada de is prètzius de s’energia chi ferrint is impresas fintzas, comenti eus biu, a ddas fai serrai puru. In prus ddoi at su smenguamentu de su valori de is redditus po nexi de s’inflatzioni.

Tocat a aciungi puru s’artziada de is intaressus po imprestai su dinai, chi abàsciat sa cantidadi de dinai chi ddoi at in giru. Un’àtera cosa de tenni in contu est fintzas sa calada de is esportatzionis.

Po s’Ocse in Itàlia su disimpreu me is duus annus chi benint at a cresci pagu, ca eus a passai de s’8,1% de ocannu a s’8,3% in su 2024. S’inflatzioni at a calai, de sa mèdia de ocannu chi est paris a s’8,1%, a su 6,5% in su 2023 e a su 3% in su 2024. Su chi at a permiti a s’economia italiana de no andai tropu mali ant a essi is investimentus pùblicus acapiaus a su Pnrr, su cumprimentu de is arreformas in contu de cuncurrèntzia e is fainas po amparai is impresas contras is prètzius de s’energia.

Massimiliano Meloni

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Total
15
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
15
Share